Mizoram Sawrkar chuan The Mizoram Liquor (Prohibition) Amendment Act 2025 ina a sawi angin Mizoram a thar chhuah thlai leh thei chi hrang hrang aṭanga Local fruit beer/wine siamna tur hmalakna a kalpui mekah, Selection & Regulatory Committee for Brewery and Winery under the Mizoram Liquor (Prohibition) Amendment act, 2025 chuan nimin (19.11.2026) leh vawiin khan Champhai District chhunga winery-te leh winery diltu mi pahnihte chu a hmunah tlawhin, an hmunhma leh an thilsiamte an endik.
MLP (Amendment) Act 2025 hnuaia Selection & Regulatory Committee-ah hian Excise & Narcotics Department, The Mizoram Banakaih (Handholding) Scheme, Horticulture Department, Commerce & Industries, Agriculture Department aiawhte bakah Technical Expert (Food Safety, Food Technology) bakah entrepreneur-te an tel a ni. Selection & Regulatory Committee hi Excise Joint Commissioner Peter Zohmingthanga’n hoin, OSD to CM R Lalrodingi leh member dangte’n Hnahlan Winery leh Champhai Winery-te bakah winery permit diltute an hmunah tlawhin an endik a ni.
Mizoram Sawrkar chuan local fruit beer hi Food Safety and Standards Authority of India (FSSAI) kaihhruaina anga thianghlim taka siam tur a nih dawn avangin Mizoram Sawrkar chu a fimkhur hle a, peih fel a nih hnuah phalna nei lova wine & beer siamtute chu na taka hrem theih an ni ang.