Jul 28, 2026
Tuesday
Govt. Aizawl West College (GAWC) chuan vawiin (28.7.2026) hian Vanapa Hall-ah Freshers’ Social 2026 an hmang a, an hun hmanpuitu Adviser to CM TBC Lalvenchhunga, MLA chuan Airtificial Intelligence (AI) rinchhan ringawta thil zir a hlauhawm thu a sawi.
TBC Lalvenchhunga chuan AI lamah khawvel a ṭhang chak hle tih sawiin, “AI hi hman thiam a pawimawh rualin, keimahni theihna tihpun tum lo a, AI rinchhan ringawta thil kan zir a hlauhawm thung. Keimahnia awm kan theihnate tichak tura lehkha kan zir a ṭul a ni,” a ti.
Adviser to CM chuan zirna ṭha chu ‘all-round development’ a nih thu sawiin, “Thangtharte hi kawng tin renga hmasawn ngai tak dinhmunah kan ding tawh a ni. A chhan chu sorkar hna hian min daih seng lo,” tiin entrepreneurship lama kan kal nasat a ṭul thu a sawi.
