News

Vawiin (21.9.2026) khan Assembly House Conference Hall-ah NITI Aayog chuan hmarchhak bial tan ‘Regional Workshop – Strengthening SITs to drive Viksit North Eastern Region’ an buatsaih a, he hun telpuitu Chief Minister Lalduhoma chuan an tum ram a san thu leh minister-te tan retreat buatsaih an tum thu a sawi.

Chief Minister chuan kum 2047-a Mizoram hmathlir document ‘Raltiang Ram’ an tlangzarh tawh tih sawiin, “Kum 2047-a India GDP a 1% lo thawhchhuah ve theih kan tum a, kan tum ram hi a sang hle a ni. Tum ram (target) lo neih ringawt kha a tawk lo a, a taka tihlawhtling tura ke kan pen a ngai. He kan tum ram thleng tur hian kan economy ruhrel hi thlak a ngai (structural transformation) tih pawh kan hria a ni. Kan tum ram min hruai thleng ngei tur ruahmanna (plan) chu State Institution for Transformation (SIT) hmangin kan siam. Chu mi hre rana ke kan pen tlan theih nan minister zawng zawngte tana intuaitharna (retreat) pawh buatsaih kan tum mek a ni,” a ti.

ITI Aayog-in State Support Mission hmanga Mizorama hma min lakpui hi kan \angkaipui hle tih sawiin Lalduhoma chuan, “Mizoram SIT hi a tichak a, plan kan siamna kawngah te, a taka kan kalpuina kawngahte sorkar laipui hmathlir milin hma kan lak theih phah. NITI Aayog Governing Council hnuhnung berah khan State Support Mission (SSM) Mizorama kalpui zel turin ka dil a, Mizoram state Assembly-ah ngei pawh SSM kan mamawhzia ka lo sawi tawh. Ka dilna ngaipawimawhin NITI Aayog chuan kum 5 dang atan SSM hi min han pawhseisak leh ta,” a ti a, an lawm takzet thu a sawi.

Workshop inkhawmah hian Niti Aayog, SSM Mission Director Dr. KS Rejimon, chuan workshop an buatsaih chhan a sawi hawng a, NITI Aayog Member Dr. Joram Aniya, Chief Secrertary Khilli Ram Meena leh Finance Commissioner Vanlaldina Fanai te pawhin thu an sawi. Hmarchhak state zawng zawngte State Institution for Transformation (SIT) te an tel.