AMC BoC an thukhawm

Vawiin (28.8.2026) chawhma dar 11 khan AMC Board of Corporator chu Aizawl Mayor H Lalremtluanga kaihhruaiin an thukhawm a, Aizawlin hma a sawn nana hmalakna tur kawng hrang hrangte sawihoin, leh rawtna an neihte chu lungrual takin an pawm. Hmun thlan bikah vawk vulh theih a ni tawh dawn.

AMC BoC-ah hian Executive Corportor K Lalrodinga’n Aizawl khawpui chhunga vawk vulh khuahkhirhna tur guidelines thar, Local Council-te rawn chunga duan chu pawmpui turin a ngen a, hei hi an pawmpui a ni. K Lalrodinga hian a hmain Local Council hruaitute kawmin, hmun thlan bika vawk vulh chungchang a sawipui a, LC-te chu an huam chhunga vawk vulh theihna hmun thehlut turin a ti a ni.

LC hrang hrangte chuan an huam chhunga vawk vulh theihna hmun tur an thehlut a, hemi en chung hian AMC chuan Aizawl khawpui chhunga vawk vulh theihna tur bik an ruahman a ni. Hei hi BoC chuan an thlirho hnuah an pawm.

AMC Licensing Regulations, 2012 hman meka fee lak dan ennawn tur a ruahmanna siam chu Executive Corporator Christina Roluahpuii Sailo chuan a pu lut a, a sawifiah nghal. Hei hi license fee tih pun bakah eizawnna hmun/dawr awmna (location) a zira license fee thliar hran dan tur rawtna te a ni.

Shop license fee dik leh rual khai zawka lak a nih theihna turin Aizawl khawpui chhunga veng hrang hrangte zone-ah then a ni tawh dawn bakah zone chhungah dawr awmna hmun a zirin grade a then hran leh a ni ang.

Heng bakah hian AMC BoC chuan AMC hnathawh zirchiang tura din Study Team-te rawtna hrang hrangte dangte pawh an pawm.