An press statement withdraw turin ti

Vawiin (31.8.2026) hian Gauhati High Court (Aizawl Bench) chuan December, 2025-a Tanhril nula Marina Lalchhanchhuahi (26) tual thihna chungchanga Mizoram Police-in January 27, 2026-a press statement an chhuah tawh chu a rang thei ang ber a withdraw turin a hriattir.

Justice Rajesh Mazumdar chuan thubuai thehluttute chhungkaw hnena zangnadawmna pek dan tur ngaihtuah turin Supreme Court-in thupek a lo chhuah tawh angin Claims Commission a din nghal a, thla thum chhunga ngaihtuah fel turin a ti. Claims Commissioner atan Aizawl Judicial District Court-a Additional District & Sessions Judge Lalngaihmawia Zote chu a ruat. Tin, Pu RL Peka (L) chhungte chhunga dan kalh a che a, an bungrua suasam a, tichhetute laka FIR thehluh tawhte chu rang tak a bawhzui a, SP chu kar tin a case monitor turin a ti. Police lama inthlahdahna a awm a nih chuan Supreme Court in a sawi angin police lam pawh hrem an ni ang, a ti.

Court chuan Supreme Court-in hetiang thil a lo thlen a, police-in vantlang mipuite a hriattir dan tur kaihhruaina a lo siam tawh ‘Police Manual for Media Briefing’ tih chu Police Station zawng zawnga hriattir vek turin thupek a chhuah bawk.

Thubuai thehluttu, RL Peka(L) nupui dilna thehluh zing a mi, Tanhril khawtlang atanga chhuak tur a tihna ‘Eviction Notice’ dated 27.01.2026 sut tura tihna erawh, court-in thutlukna tawp a siam hmain June 10, 2026 khan Tanhril NGO hruaitute’n an sut tawh tih tarlan a ni bawk.

He mi kaihhnawiha buaina chhuakah hian High Court chuan dan kengkawhtu turte berin, mipui thinrim pungkhawm kara, dan kenkawh kawnga an hlawhchham thu an sawi chu vanduai thlak ber (most unfortunate) nih thu a sawi. Buaina chhuah laia, RL Peka (L) chhungte chunga police-in venhimna an pek theih loh chhan hi mipui pungkhawm tam em vang a nih thu an sawi a; amaherawhchu, heng humhimna pek a nih theih nan hian eng thil nge an tih a, hma an lak tih erawh engmah tarlan a ni si lo tiin Court chuan a sawi.

He case WPC 12/2026 ah hian JC Lalnunsanga chu thubuai thehluttute tan a ding a, sawrkar tan Lalnunhluii a ding.