News

Aizawl Bawrhsap Lalhriatpuia chuan vawiin (24.9.2026) hian DC Conference Room-ah kum 7 chhung Treasury Square leh a chhehvela chhum lo chat loa ruihhlo leh sual rem theih nana lo duty tawh mi 15 te thingpui a inpui. District administration-in an inpekna an ngaihhlutzia lantir nan chawimawina thuziak (letter of appreciation) pein, duty-te thingpui inna tur Rs.15,000 a hlan nghal.

Lalhriatpuia chuan “Kan lawmthu sawina hi beitham hle mah se, khawtlang tana in inpeknaa kan lawmzia, hlutzia leh ngaihsanzia che u lantirna (token of appreciation) a nih avangin min pawmsak ngei ka beisei a, in kal zelna turah District administration chuan duhsakna sang ber a hlan che u a ni. Tunhnaiah Mizoram dung leh vangah ruihhlo a hluar em em a, a dona kawngah nasa taka tanho a tul hle. Ruihhlo do kawngah Venghlui Paho Zing Duty chuan kum sarih chhung hma in lakna te ka lo hriatin ropui ka ti hle a, in inpekna avangin nasa takin ruihhlo hluar zel tur pawh tihremin a awm ka ring tlat a ni,” a ti.

Venghlui paho pawhin report pein, duty hi July 27, 2019 atanga an lo kalpui tawh thu te, a tirah chuan welfare leh section ang tein hma an la tan a, tunah chuan Branch YMA-a OB nilai leh ex-OB te nen pahoten mahni thahnemngaihna atangin an kalpui mek zel tih an sawi.

Venghlui paho chuan Bawrhsapin an hmalakna DC in a hlutsaka a, a hriatpui chu lawmawm an ti hle, tih an sawi . DC hnenah Treasury Square leh a chhehvel a lo him zawk theih nana thurawn an neihte an thlen bawk a ni .Letter of appreciation hi heng a hnuaia Venghlui paho hnenah hian Bawrhsap chuan a hlan.

1.R Tlanghmingthanga

2.Vanlalruata Ralte

3.Lalhmingthanga

4.W. Pahlira

5.Thanhlira

6.VL Hmangaiha

7.K Lalchhuanmawia

8.C Zoliana

9.Lalliana Sailo

10.Lianhmingthangi

11.F Lalliansanga

12.Lalkohchhuaha

13.PC Lalsangluaia

14.Churchill Lalchamliana

15.Lalhmingliana Hnamte