News

Vawiin (20.8.2026) chawhnu dar 2:30 khan MNF President Zoramthanga, Ex. CM chuan ama puala hun buatsaih, Special Lecture-Cum Interactive Programme chu Gauhati University, Phanidhar Dutta Seminar Hall-ah khuallian niin a hmanpui.

He hunah hian MNF President Zoramthanga’n kum 1966-a, Gauhati University hnuaia awm ṭhin D.M (Dhanamanjuri) College, Imphal aṭanga Bachelor of Arts a lo pass tawhna certificate chu Gauhati University chuan an hlan. Zoramthanga hian D.M College aṭang hian English Major lain final year a exam zawh veleh ram leh hnam tan zalenna suala Laldenga kaihhruai MNF movement a zawm tak avang leh, inremna awm hnuah pawh politics-ah a hun pum a hman zui tak avanga B.A Degree Certificate a lak ve tak loh chu vawiin hian hlan a lo ni ta a ni.

MNF President Zoramthanga hun hmanna programme thupui hi “From Guerrilla Fighter to a Peacemaker by Shri Zoramthanga” tih niin, tun hnaia a lehkhabu ziah “From Guerrilla Fighter To Chief Minister” tih, Penguin Random House India tihchhuah behchhan leh Zoramthanga hringnun zinkawng behchhana buatsaih a ni. He Event hi The Gauhati University Institute of North East India Studies (GUINEIS) and Omeo Kumar Das Institute of Social Change and Development (OKDISCD) buatsaih niin, university zirtirtute leh zirlai sang rualte nen hun hlawhtling tak hman a ni.

Zoramthanga chuan a puala hun ropui leh chhinchhiah tlak tak buatsaihtute chungah thinlung taka lawmthu sawiin, “Ka tan mellung pawimawh, ka hriatreng tur leh ngaihhlut berte zinga mi a ni,” a ti.

Certificate hlanna neih zawh hian Special Lecture-Cum Interactive Programme neih zui niin Gauhati University zirtirtute leh zirlaite nen zawhna leh chhanna hun hlawhtling tak neih zui a ni.

MNF President hi MNF Sr. Vice President Dr. R. Lalthangliana, MNF GHQ hruaitu ṭhenkhat leh MNYF Headquarters hruaituten an ṭawiawm a ni.