CaratLane-in Aizawla an dawr pahnihna an hawng

Vawiin (9.10.2026) chhun khan tunlaia sumdawnna khawvela hming chher tawh, Tata product — CaratLane chuan Aizawl khawpuiah a dawr pahnihna chu Ch. Saprawnga Building, Chanmari-ah Zirtawpni khan Zo-Inspiration Founder Emmanuel Thangrosanga chuan khuallian niin, ribbon chep chatin a hawng.

Khuallian chuan hawnna inkhawmah thu sawiin, tunlai thiamna hmanga mawi taka chei mawi (modern & contemporary design) tlereuh, company changtlung leh certified ngei CaratLane chu Aizawla hawn a ni ta chu lawmawm a tih thu a sawi a. “Mizoram chu sumdawnna leh changkanna kawngah hma a sawn zelzia a tilang chiang a ni,” a ti.

Khuallianin a hawn hnu hian charcoal breaking ceremony neih a ni a; hemi zawh hian Prayer Ministry Speaker Lalrawngthangi’n Pathian hnenah dawr thar hi hlanin, a tawngtai a ni.

Mizorama business partner Lalhmingsangi (Masangi) enkawl CaratLane hian diamond, gold, platinum, silver leh gemstone chi hrang hrang an zuar a ni. Heng an thil zawrh te hi BIS Hallmark vek niin, an diamond hman zawng zawngte hi natural vek an ni.

Bengbeh, thi, zungbun leh thil dangah te hian design thlan tur sing chuang a awm a; heng bakah hian mahni duhdan anga customisation siam tir theih a ni.

Dawr thar hawnnaah hian mipui tan hamthatna hrang hrang pho chhuah a ni. CaratLane-a thil lei tawh phawt chu vawiin ni hlutna zelin thleng leh hralh (exchange or buyback/cashback) theih a ni. CaratLane tlereuh man hi Rs. 5,000 atanga in tan a ni a, tunah hian India ram mipuite rangkachak leh diamond lei nana an hun nghahhlelh em em — Puja discount (20% off on MRP) pawh hman mek a ni.

Heng bakah hian, rangkachak hlui engpawh vawiin ni rangkachak hlutna ang zelin Dawrpui leh Chanmari dawrah an thleng thei a; rangkachak takzawng (purity) endikna khawl tunlai khawl ‘Karatmeter’ hmangin engtiklai pawhin a dik leh dik loh an endik sak thei bawk ang.

Mipuiin awlsam leh hlawk zawka rangkachak leh lunghlu an lei theihna turin plan tha tak ‘Treasure Chest’ an buatsaih bawk a, hei hi thla 9 chhung thawh niin, a thla 10-naah company-in a lo tumpui ve dawn a ni.