FCS&CA Minister-in HPCL hotute a kawm

Guwahati-a cham mek Food, Civil Supplies and Consumer Affairs Minister (FCS&CA) B Lalchhazova chuan vawiin (October 22, 2026) Mizoram House-ah HPCL hotute kawmin, Mizorama oil depot bun a nih theih nana hmalaknate a sawipui.

B Lalchhanzova chuan HPCL-in Mizoramah oil depot an neih ngei theih nan tha thlah lo in an um zel thu sawiin “Kan hmalaknaten rahtha a chhuah ngei theih nan kan theihna zawng zawngin kan bei zel dawn a, HPCL bakah IOCL lamte nena oil depot siam tura indawrna a la kal ve zel. Chief Minister remtihna angin Oil Depot siamna tur hmunhma pawh oil company-te hnenah man awm lo a pek mai theih beisei a ni,” a ti.

Supply Minister chuan Mizoram chu tlang leh suarin a bawm vel ram tlawhpawh awlai lo a nih avangin India ram state dangte hmasawn rualin hma kan sawn chak lo bik hle tih sawiin, “Oil company-te pawhin hlawk tumna atang ringawta thil thlir loin, Mizoram mamawh tihsak chu an company tan pawh van malsawmna dawn belhna tur a ni ngei dawn a ni,” tiin Mizoram chhim lama sumdawnna kawng inhawng mek en chungin chhim lamah pawh oil depot hi hawn belh zel dan thlithlai turin HPCL-te hi a chah.

B Lalchhanzova chuan Mizoram hmar lamah 5 acre vela zai ram an lo zawng ang a, kumin chhung ngeiin en hoa, tih fel a duh thu HPCL hotute hi a hrilh.

Meeting-ah hian HPCL aiawhin General Manager (Operations) Gurubachan Singha, Rahul Kumar Singh, CRM leh Ratul Bora, DGM te an tel a ni.

Meeting zawh hian Pu B.Lalchhanzova chuan Betkuchi hmuna HPCL Oil depot chu a tlawh nghal.

Mizorama oil depot bun a nih theih nan hian HPCL Kolkata Oil Terminal chu Supply Minister hian July 12, 2024 khan a lo tlawh tawh a ni. Inbiakna pawh thui tak kalpui tawh niin North East Zone hawn a nih takah hian Guwahati-a an hmunpui lamah oil depot chungchang hi Minister hian a bawhzui zel a ni.