Lengpui Airport cheithat an tlawh

Vawiin (22.10.2026) hian Mizoram State Project Monitoring Committee (MSPMC) chuan an Vice Chairman R. Lal Rinawma hoin Lengpui Airport cheithat hna thawh mek ‘Improvement & Upgradation of different facilities at Lengpui Airport’ chu a vawi 5 nan an tlawh.

Sorkar thuchhuah tarlan danin, MSPMC hian April 22, 2024 khan a hmasa ber atan endik hna hi an thawk a, June 6, 2024 khan a thawh hnihna atan endik lehin, June 26, 2024 leh October 4, 2024 ahte an lo endik tawh bawk a ni. He hunah hian MSPMC memberte bakah, PWD, PHED, P&ED, Aviation, DIPR, MJA leh CISF hotute an tel a ni.

Contractor pahnih Zoramchhana, Electric Veng, Aizawl leh KR Construction, Thuampui, Aizawlte chu Lengpui Airport cheithat hna thawk tura thlan an ni.

MSPMC hi Team A leh B ah inthenin Team A hian Lengpui Airport building leh a chheh vel civil works endik hna an thawk a, Team B hian electrical works leh siapi ho chenna barrack an endik thung a ni.

Endik hna an thawh zawh hnu hian Lengpui Airport departure floor (first floor) buildingah inkawmhona leh an endik hna thawh atanga an hmuhchhuahte an thlirho. MSPMC member-te chuan endik hna an thawh hmasak ber tuma an ngaimawh leh vei zawng thil chi hrang hrang 19 an sawite bawhzui a nih kawngah thawktuten theihtawp an chhuah chu lawmawm an tih rualin duhkhawp lohna an neihte an tarlang a, works department aiawh official-te nen sawiho a ni.

MSPMC memberte’n an ngaihmawh chi hrang hrang an tarlan zingah 1st floor a central A/C (air conditioning) chawmtu generator thawm ring lutuk leh VIP lounge tura ruahman chhungah pawh ring taka inbiak a ngai chu an ngaihmawh thute, Lengpui Airport venghimtu sipaite riahna security barrack chungchangte, ceiling leh LED light eng thei lo tam lutuk chungchangte, departure ramp chungchangte leh thil dang engemawzat a tel.

MSPMC memberte chuan lehkha leh tawngka pawha hriattir an ni chunga he hna thawk tura thlan contractor pahnihte an rawn lang lo chu an ngai thutak hle tih an sawi a, hnathawh hun tlem avanga hna thawh chak loh chhan nia official-ten an sawi CISF hovin zan dar 10 hnu lama hna thawh an phal lo leh an hnathawh duhna hmunah an duh huna hna an thawh theih loh chungchang chu works department-te, aviation leh CISF chu dawhkan khat kila sawiho turin thurawn an pe a ni.

Official-te hian departure floor (first floor) hi an siam zawh thawkhat tawh thu tarlangin November thla laihawl hian ground floor (arrival floor tur) lama awmte leh an bungruate first floor lamah an suan chho ang a, ground floor siam that hna ngawrh zawka an thawh tur thu sawiin, January, 2027 ral hmain zawhfel hman an inbeisei tih an sawi. Departure floor luhka khuhna tur Front Canopy pawh a satu tur thlan fel tawh a nih thu leh a hmanrua mamawhte chah mek a nih thu pawh tarlangin tluang taka an thawh theih chuan March, 2027 thla tawpah Airport cheithat hna zawhfel vek an inbeisei tih an sawi.

MSPMC Vice-Chairman R. Lal Rinawma chuan vawi 4 an tlawh tawh thu leh an ngaihmawh an sawi tawhte pawh tih that a ni mumal lo tih a sawi a, hmasawnna an hmu tam lo tih a sawi bawk. R Lal Rinawma hian hnathawh quality duhthu a sam lo chu pawi a tih thu sawiin, MSPMC anga an tih theih chin an ti tih a sawi a, tate dangin thil an nei thain an nei changkang a, mipuiten min khaikhin dawn a ni,” tiin Lengpui Airport chu Mizoram hmel lanna ber pakhat a nih avangin hetianga hna thawh a nih chuan mipuite atanga sawiselna tawn tur a huhphurhawm dawna a hriat thu a sawi.

Tun dinhmunah KR Construction hi completion certificate pek tawh a ni a, Zoramchhana erawh completion certificate pek a la ni lo.