News

Central YMA chuan thuchhuah siamin, September 28-30, 2026 chhunga ram pum huapa bank hnathawktuten nawrh huaihawt an tum avanga Public Sector Bank leh Regional Rural Bank-te Pathianni, September 27, 2026-a inhawng tura thutlukna siam a ni chu pawi an ti hle tih an tarlang.

Mipuite tan tluang taka bank hna hi kalpui tha an tih thu tarlangin CYMA chuan, “Hetih rual hian kan sakhua leh nunphung hi min zah sak se kan duh. Mizoram cheng tam berte hi Kristian sakhua zuitute kan ni a, chuvangin, Chawlhni hi Pathian biakna, tawngtaina leh sakhaw serh leh sang hman hun a nih avangin tunhma atangin dawr leh sumdawnna hmun hrang hrangte pawh khar thin a ni,” tiin Ministry of Finance, Reserve Bank of India (RBI), bank thuneitute leh Mizoram Sorkar hnenah he thutlukna hi Mizoram bik tan kaltlangpui chi a ni em tih ennawn leh tura an ngen thu an tarlang.

CYMA chuan kawng dang, entirnan—bank hawn hun chhung pawh sei, ATM tihchak leh digital banking tih hmasawn emaw, mamawh bik tana emergency service siam theih ni se an duh hle tih tarlangin, “Awlsam taka mipuiten bank an dawr theih hi tha kan tih rualin, bank hnathawktute sakhaw vawn leh an dikna te, Mizoram mipuiten sakhua kan ngaihpawimawhna hi zah
sak ni se kan duh. Mizoram sakhua leh khawtlang nunphung nghawng thei thutlukna reng rengah thuneitute chu State Sorkar leh a kaihhnawih pawl hrang hrangte nena sawihona mumal tak neih hmasak hnuah chauh kalpui thin ni se kan duh a, hemi chungchang hi siam rem theih ni se kan duh hle,” an ti.