Oct 20, 2025
Monday
October 18 leh 19, 2025 chhung khan Chhandamna Kohhran (Salvation Church of India) area hrang hrang Aizawl, Lunglei leh Kolasib ah te Bial Inkhawmpui (Area General Assembly) neih a ni.
Aizawl Area chuan Aizawl Kohhran, Ramhlun Venglaiah, Kolasib Area chuan Diakkawn Kohhranah leh Lunglei Area chuan Zobawk Kohhranah bial inkhawmpui hi an hmang a ni.
Ni 18.10.2025, khan rorel inkhawm neiin, kohhran pawipang leh rawngbawlna lama hma lakna turte relin nilengin hun an hmang. Rorelnaah hian palai an kal tha hle a ni.
Inrinni zan atanga Pathianni zan thleng khan Pathian faina inkhawm neih a ni. Heng inkhawmahte hian zaipawl, malzal leh Pathian fakna chi hrang hrangte hmangin hun hman a ni a, pastor-ten thupui thlansa hmangin Pathian thuchah an puang.
Chhandamna Kohhran hian Chanchin Tha hril chu thupuiah neiin, Mizoram chhung mai bakah state dangahte rawngbawlna an kalpui mek. He rawngbawlna hi nasa zawka kalpui zel anih theih nan Area hrang hrangte hian hmalam hun atan ruahmanna thahnem tak an duang hlawm a ni.
