Chief Minister-in hmanpui

Vawiin (1.10.2026) hian Chief Minister Lalduhoma chuan Little Flower Convent School, Serchhip kum 50 (golden jubilee) lawmna-ah khuallian niin hun a hmanpui.

Chief Minister chuan LFCS Golden Jubilee lawmnaa a tel thei chu lawmawm a tih thu sawiin, kum 50 hmel a hmuh theih nana LFCS chhungkua zawng zawngte thawhrimna leh inpeknaah lawmthu a sawi a, “Kum 1976-a din a nih tirha zirlai 18 chauh nei, tunah zirlai 1,007 leh zirtirtu 33 nei mek, he sikul hian sawrkar officer, doctor, engineer leh eizawnna hrang hranga mi hlawhtling tak tak a chher chhuak tawh a ni,” a ti.

Zirna a ngaih pawimawh thu sawiin Lalduhoma chuan, “Zirtirtu pawh eng emaw zat lak thar an nih bakah, hmun hrang hrangah zirna in tih changtlun mek zel a ni. Zirtirtute quarters sak mek a ni a, zirna sang zawkte pawh ngaih pawimawh niin NIT Mizoram harsatna pawh chinfelsak an nih tawh. Mizoram Engineering College pawh a taka kaltir tumin thapui kan thawh mek a, Mizoram State University pawh kan bawhzui zel,” tiin thangthar lo awm zel turte tan hian zirna tha zawk neih an tum thu a sawi.

Little Flower Convent School hi February 2, 1976-ah din a ni a, a thupui chu “In thy Light We See Light” a ni. A tirah zirlai 18 chauh awm-in, Catholic Kohhranin kum 14 a enkawl hnuah 1990-ah Mizoram Sorkarin zirtirtu 6 leh staff 1 Deficit Pay Scale-in a rawihsak tan . SSA hnuaiah tih changtlun chhunzawm zel niin, tunah zirtirtu 10-ah tihpunsak an ni tawh.