Chief Minister-in Hnahsin Kut a hawng

Vawiin (14.10.2025) tlai khan Chief Minister Lalduhoma’n Champhai Zotlang Mualah Hnahsin Kut, 2025 a hawng a, tourism hmangin sum tam tak hmuh theih a nih thu a sawi.

Chief Minister chuan kan ramah hnam dangte an rawn zin a, kan ram mawizia te, boruak nawmzia te, nature hmuhnawmzia te an rawn hmu tih sawiin, ‘Khualzin hipluh theihna remchang kan ngah tih an hria a ni. Nimahsela, keimahni zawkin kan hmang thiam mai si lo va. Theihna tam tak nei, hmang chhuak thiam si lo khan kan awm reng thin. Tunah chuan thangthar fingvar zawk in lo chhuak a, Tourism Department pawhin tourism sector a kalpui thiam tial tial. Nikum chhung khan Mizoram chu hmarchhaka khualzin hipluh lama hmasawn nasa ber kan ni ta a ni. Chhinchhiah chinah khualzin mi 5,20,000 chuangin Mizoram an rawn tlawh a, a kum hmasa aia a punna chu 139.50% a ni. Kuminah relin Sairang a rawn thleng ta a, khualzin hi an pung hle turah kan ngai,’ a ti.

Kan ram hi kan enkawl thiam a, kan khawtlang nun mawi tak hi kan zawrh thiam bawk chuan sum leh pai tam tak hmuh theihna leh kan hnam chawilarna remchang tak kan nei tih sawiin Lalduhoma chuan, ‘Khualzin tana tlawh nuam taka insiam thiam hi tourism sector-a a pawimawh lai ber a ni. Kan ram mawi tak an rawn hmuh rual hian Zo nun ze mawi, tlawmngaihnate, rinawmnate, aia upa zahna te, mikhualte chunga that chhuah thin hnam kan nihna te hi rawn hmu tel ngei se. Kan hnam kan chawimawi tihna a ni nghal zel. Tin, khualzin rawn kal tam ber turte hi foreigner an ni lo va, kan Indian-pui, vai kan tihte khu an ni hlawm . Vai rawn zin hi lo tawngpawng hlauh ngawt tur a ni lo. ILP neiin an rawn lut a, an haw a hunah an haw ve leh mai dawn,’ tiin khualzinte hian kan ramah sum leh pai an rawn hmang a, chung chu keini tan sum lakluhna hnar nih thu a sawi.

Kut hawn inkhawmah hian organising chairman Dr. Samuel Laldinthara chuan kal khawmte lawmna thu a sawi a, an tum ber chu khualzin hip a nih thu a sawi. Kumin hi a tum hnihna niin Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te tangkawpin Champhai mipui behchhana an buatsaih a ni.