CM-in CSR Conclave a hawng

Ninin (24.9.2026) khan Mizorama Corporate Social Responsibility (CSR) Conclave hmasaber Mizoram CSR Cell leh CII tangkawpte bultuma buatsaih chu Chief Minister Lalduhoma’n Aijal Club-ah a hawng. Conclave hi vawiinah chhunzawm a ni ang.

A hawnna thu sawiin Chief Minister chuan, company hrang hrang aiawh lo kalkhawmte chungah lawmthu a sawi a, “CSR fund hi India ramah kum tin cheng vbc. 34,000 vel a awm thin nia ngaih a ni a, ram hmasawnna hna tha tak tak thawhna sum hnar tangkai tak a ni. Amaherawh chu, hmarchhak bial leh Mizoram hian CSR hi kan dawng tlem hle a, industrial state-ten an dawng tam bik thin. Mizoram hi a ralmuang a, ziak leh chhiar thiam tamna state kan ni a, khawtlang nun nuam tak leh sorkar ngelnghet tak nei thin kan ni. CSR Project kalpui nana hmun tha, remchang tam tak awmna a ni. Hei hi CSR Fund nei company-ten min rawn hmuhpui a, kan state-a hmalak theihna remchangte min rawn hriatpui hi kan duh a ni,” a ti.

Nikum khan CSR Cell leh CII tangkawp chuan CSR Workshop a buatsaih tawh a, chu mi zarah chuan Mizoramah CSR Project pahnih New Age technology Labs project leh Darzo Ground Water Recharge Project te kan hmu tih sawikn Lalduhoma chuan, “Kan lawm hle. Kuminah Mizorama a vawi khat nan conclave kan han huaihawt leh a. Investment kalpuina tur chi nia kan ngaih project 85 zet kan lo duang lawk a ni. Rah tha tak tak a chhuah kan beisei a ni,” tiin company palai lo kalte chu Mizorama hun nuam tak hmang turin a chah.

Mizoram CSR Conclave hmasaberah hian company lian aiawh mi 25 vel lo tel tura beisei an ni a, khawchhiat vanga thlawhna kal a sukuk deuh hlek avangin a rawn kal zat tur hi hriat theih a la ni lo.

Mizoram CSR Cell chuan heng Company aiawhte hmaah hian Mizorama CSR Fund hmanga Investment kalpui theih tur chi department hrang hrang atanga a lakkhawm project 85 a chhawp chhuak dawn a, department official-te leh company aiawhten an sawiho zel dawn a ni.

Conclave-ah hian SBI chuan an CSR atangin Mizoram Sorkar hnenah garbage truck a pe dawn tih an puang a, HDFC pawhin an CSR atanga Aizawl Civil Hospital Trauma Centre Building sak zawmna tur (vertical extension) Nephrology leh Urology Ward atana hman tur, Mizoram sorkar an pek tur thu an puang a ni.