Vawiin (12.10.2026) chhun khan Chief Minister Lalduhoma chuan sorkarin Ainawn Venga Mizo Students Union tana ram a pekah, MSU Building sakna tur lungphum a phum.
Chief Minister chuan kan ram leh hnam tana pawl pawimawh leh lian, kan hnam kal zelna tura pawimawh zui zel tur hi kan nei tih sawiin, “Chung zinga pawl tam zawk chuan mahni puala hmunhma neiin office-te pawh an nei tawh. An zinga hmunhma leh office la nei ve lo chu MSU te hi an ni. Heng pawl pawimawhte hi ngelnghet takin awm se tih hi kan thinlungah a awm. MHIP Office building thar tur kan sa mek a, MUP office kan sak zawm mek a, YMA tan Thingsulthliahah Convention Centre lian tak kan sa mek bawk a ni,” a ti.
Ainawn veng hi tun hmaa sorkarin sorkar hmunhma atana tha taka a duan a ni a, a sulsutu chu Chief Minister Brig T. Sailo a nih thu sawiin Lalduhoma chuan, ” Ruahmanna fel tak nen a bul tan mah se, a hnu lamah mumal taka kalpui zui a ni ta lo va. Kan sorkar hnuah Ainawna sorkar ramte hi a theih ang angin kan singsa a ni. Chu mi kan kalpuina lamah chuan kan tlawmngaipawl pawimawh zinga ram nei lo MSU tan he lai hmun hi kan pe ta a ni. An mamawh kha office a nih avangin office sakna tur sum hi ruahmanna kan siamsak zui zel,” tiin hun rei tak mahnia hmunhma leh office nei lo MSU-te a lawmpui thu a sawi.