News

Chief Minister Lalduhoma chuan vawiin (2.10.2026) chhun khan Lunglei Convention Centre-a Students’ Self-Support Union (SSU) General Assembly vawi 40-na chu khuallian niin a hmanpui a, ṭhalai taimate tan sorkarin jubilee dar a vuak mek thu a sawi.

Chief Minister chuan Mizoram Sawrkarin ṭhalaite tan hma lakna a ngah thu leh ṭhalai taimate tan jubilee dar an vuak mek thu sawiin, “Sawrkar hna lak tinreng dik taka kalpuiin, a thiam thiam lak an ni. Mi zawng zawng tan intluk tlang taka remchang siam vek a ni. Sawrkar hna thawk tura sawipuitu ṭha ber chu thawhrimna a ni. Ṭhalai, sports lama talent neite dap chhuah hna kalpui mek a nih thu leh chher zui tlak nia hriatte chu Handholding – Empowering Mizoram Sports hmangin an banah kaih an ni. Sumdawnna leh thil siam chhuah lama theihna neite tan Flagship Scheme – Bana Kaih kalpui mek a ni a, thil thar hmu chhuak a, sumdawnna kalpui theite tan Bana Kaih Venture Capital Fund siam niin, venture capital fund siam hi Mizoram chanchina a vawi khatna a ni,” a ti.

Sawrkarin industry lamah uar taka hma lak a duh thu leh Mizorama lo neitute thar chhuah beh chhana industry din theite tan phei chuan sawrkar a inhawn lehzual thu sawiin Lalduhoma chuan, “Fruit Beer/Juice siam phalna dan neih thar beh chhanin ṭhalai tam takin a siam chhuah dilna an theh lut tawh. Kut hna thawka ei zawngte tan thlai thar leina a hranpaa budget-a dah a nih thu leh thlai thar lei kum 2 kalpui hnuah a thawh thumna kalpui ṭan a nih leh tawh. Chhungkaw tam takin an din chhuahpui. Kum khata cheng nuai 20 dawn dawn la lutte pawh an awm. Handholding version 3.0-ah thil thar pakhat – ṭhalai ram dang (foreign)-a hna thawh tumte tana loan awlsam siamsak tum a ni,” tiin sawrkarin kil tinah ṭhalaite leh mipuite tan remchang a chhawpsak mek thu a sawi.