News

Vawiin (7.9.2026) hian Chief Minister Lalduhoma chuan Administrative Training Institute (ATI) ah, ATI office application thar Smart ATI App, Smart Classroom leh Digital Learning Laboratory-te a hawng.

A hawnna thu sawiin Chief Minister chuan, “Internet hmang tangkai zawnga hmalakna kan uar chho zel. Digital lama hmasawnnain khawvel min tuam lai a ni a, awlsamna tam tak min thlen mek a ni. Keini pawhin kan hman uar tial tial hi a tul. Ka mimal vision-ah phei chuan Mizoram hi digital state-a siam ka duh a, ka tum bawk a ni,” a ti.

Digital state ni tur hian a hranpa takin mission emaw scheme emaw nei rih lo mah ila, thil tih theih nia a hriat thu sawiin Lalduhoma chuan, “Mipui kan la tlem a, ziak leh chhiar thiam kan tam. Nih theihna remchang kan ngah a ni. Kan sorkar hnua ICT Department kaltlanga portal thar kan siam hi, siam zawh tawh kan hman mek portal 19, hman mai theiha zawh fel thawkhat tawh 4, siam mek 7, hmalak mekna 6, an vaiin portal 36 kan nei tawh. Firm dang nena kan siam zawng zawngte nen phei chuan a tam ve tawh viau ang. e-office kan kalpui mek hi office zawng zawngah hmang bawk ila, kan fel deuh duak mai dawn a ni,” tiin a sawi chhunzawm.

Vawiina digital service thar hawnte hi ATI Training Programme-te hmuh theihna, registration tih theihna leh training chungchang information an dawnna tur platform a ni. He app atang hian course material leh training certificate-te pawh pek a ni tawh dawn. Training catalogue, course information, eligibility, application status, notification, attendance leh training history thlengin digital-a vawn leh enkawl vekna tur a ni. User-ten an bio-data leh service details vawikhat an register tawh chuan an hmang nawn zel thei tawh ang.