Home

News

CM-in thil pali a tlangzarh

News

CM-in thil pali a tlangzarh

CM-in thil pali a tlangzarh

Vawiin (15.5.2026) hian Chief Minister Lalduhoma, Finance Minister ni bawk chuan a office-ah Mizoram Sorkar sum enkawlna lama kalphung thar pali (Digital Financial Management kalphung thar) Mizoram Integrated Works Accounts System (MIWAS), e-Budget Module, e-Sanction Module leh 100% Direct Benefit Transfer tharte a tlangzarh. MIWAS hmanga bill hmasaber a pass nghal.

Sorkar thuchhuah tarlan danin, Finance Department hnuaia kalpui heng hmalaknate hian sawrkar sum enkawlna kawngah langtlang leh dik taka sum hmanna a thlen dawn. Eirukna venna hmanraw tha tak an ni bawk ang.

Chief Minister chuan, department thenkhatin sorkar kum tawpa SNA SPARSH an dah zero theih loh avangin sum tam tak a lapse tawh tih sawiin, “Tun hnaiah department thenkhatin a hun taka UC an thehluh theih loh avangin SASCI Fund approval kan hmu leh mai thei lo bawk . Tun hnuah chuan administrative approval an hmuh atanga thla thum chhungin tender an tichhuak thei vek tawh tur a ni tih hi sorkar duhdan a ni,” a ti.

Sorkar sum enkawlna kawngah lang tlang, thianghlim leh dik an mamawh tih sawiin Lalduhoma chuan, “Sum reng reng hi a thlenna hmun tur dik taka a hun taka a thlen a tul. Sum leh pai enkawlna tha zawk mamawhna hi a sang zel a ni. Chuvang chuan sorkar pawhin tan kan la a, kan phak tawka kan hmalaknaten rah tha a chhuah a, kum kalta khan Mizoram-in SASCI Part IX hnuaiah incentive cheng vaibelchhe 350 kan dawng,” tiin 2026-27 chhungin SASCI Part IV leh Part IX hnuaiah cheng vaibelchhe 650 vel hmuh leh an beisei thu a sawi.

Digital Financial Management System hawn tharte chanchin tlangpui:

1.MIWAS (Mizoram Integrated Works Accounts System): MIWAS hian department paruk – Public Works Department (PWD), Public Health Engineering Department (PHE), Power & Electricity Department (P&E), Irrigation & Water Resources Department (IWRD), Environment, Forest & Climate Change Department (EFCC) leh Land Resources, Soil & Water Conservation Department (LRS&WC) hnuaia works accounts-te felfai zawkin a enkawl dawn a. Accountant General hnena sum hman dan leh Treasury kaltlanga expenditure voucher thehluhna kawngah a pui ang. A hriatthiam dan awlsam ber chu Cheque System nuaibona a ni.

2.e-Budget Module: e-Budget Module hmang hian IFMIS kaltlangin online-a budget proposal buatsaih leh thehluh theih a ni dawn a, hei hian kut-a thawh ngai, chhut sual awm thei leh thehlut tlai awm thinte a titlem ang.

3.e-Sanction Module: e-Sanction Module hmang hian sum hman phalna (expenditure sanction) online-a buaipui theih a ni tawh ang. Drawing and Disbursing Officer leh Head of Department atangin Administrative Department leh Finance Department hnenah electronic hmanga a thawn theih tawh dawn avangin hei hian budget-a sum awm bak hman palh tur thlengin a veng dawn a ni.

4.Sorkar laipui duh dana 100% Direct Benefit Transfer System: 100% DBT hnuaiah chuan State scheme hrang hrang – Thlai Thar Leina, Bana Kaih leh Power Subsidy hnuaia sum pek turte chu Treasury-in bill a pass hnuah beneficiary-te bank account-ah direct-in thawn nghal a ni tawh dawn a. IFMIS kaltlangin a payment status pawh chhui zui theih a ni tawh ang.

Heng bakah hian IFMIS hnuaiah tun hnaiah khan e-Voucher te, Pension Module leh Employee Module 2.0 (e-HRMS) te siam an ni tawh a, hei hian Mizoram IFMIS hi nasa takin a tichangtlung tawh a ni.

More Posts

Zu siamna hmun ti chhia

Vawiin (20.11.2026) chhun khan Excise & Narcotics Dept. Aizawl District chuan Rangvamual leh Phunchawnga zu siamna zawn chhuah leh tih chhiat runpui an nei. Anti Narcotic Squad leh Aizawl District Excise & Narcotics Dept-te fehchhuakin rakzu siamna hmun 22-ah zu bilhlai ṭin 5,054 an tichhia a, zu siamna hmanrua pawh tam tham tak an man. […]

Top 10-te an inbuatsaih tan

EverHome Youth Icon 2026 intihsiakna neih meka top 10 intihsiakna hmachhawn tur mi 11 te chu an mentor-te nen an inbuatsaih tan a, round sang intihsiakna chu November 23,2026 (Thawhtanni) zanah neih a ni dawn. LPS Vision Production chuan Ningani zan khan top 10-a tling te hming an puang chhuak. Round sang intihsiakna hmachhawn tur […]

Ramri siam rem a ni

Vawiin (20.11.2026) chawhnu dar 2:00 khan Kolasib Bawrhsap H. Dolianbuaia chuan Saipum leh Saiphai khaw inkar ramri lung (village boundary pillar) a phun. Hemi hnu hian Govt. Middle School, Saipum-ah khaw pahnihte ramri inhlanna leh inremna thuthlung ziahna hun an hman chhunzawm. Kolasib Bawrhsap chuan thu sawiin, “Harsatna leh buaina a lo thlen changin a […]