News

Nimin (8.10.2026) khan Chief Minister Lalduhoma chuan a office-ah KTC Group Japan Director Yamazaki Tomohiro leh a thawhpuite a kawm a, Mizorama tana KTC Group-in hma an lak theih tur thilte an sawiho.

Chief Minister chuan, “Tunah hian Japan ramah Mizo thalai 100 velin hna an thawk mek a, nuam an ti tlang niin kan hria. Japan leh India Sorkar thawh dunna hnuaiah Japan International Cooperation Agency chuan Mizoram leh hmarchhak state-ah hmalakna lian tak tak a kalpui mek a, kan tangkaipui hle. Japan nen hian a theih phawt chuan thuk zawka inzawm kan duh avangin tun hnaiah CM office-ah Working Committee on Japan Mizoram Partnership kan din a ni,” a ti. KTC Group nena an inkawmna pawh hi Working Committee bultuma neih a ni.

KTC Group hotute nen hian skill development lama Mizo thalaite tana hmalak theihna lai te, Mizo thalai tam zawkin Japan rama hna an thawh theih dan tur te leh Mizoram Sorkarin Blue Mizoram Mission kalpui a tum meka thawhho theihna, Mizoramin Sangha tam zawk a tharchhuah theihna tura thawhhona turte an sawi.

KTC Group hian Mizorama hmalakna kalpui a chak thu Chief Minister hi an hrilh a ni.

KTC Group hian April 1972 khan Japan rama Aichi Prefecture, Nagoya ah Educational materials siamchhuakin bultan an tan a,tunah hian an hnuaiah company 67 lai awm tawh. Khawvel pum huapin hnathawktu 6,500 chuang an nei tawh a ni.