Aizawl District Congress Committee (ADCC) chuan vawiin (8.10.2026) khan Lal Thanhawla auditorium-ah kum 2026-2028 chhunga Aizawl City Block Congress Committee hruaitu tharte lawmpuina hun an buatsaih a, an hun hmanpuitu MPCC President Lal Thanzara chuan Congress Party nasa taka an than chu a sawi.
BJP chungchang sawiin MPCC President chuan, “Tun hnaiah BJP hotupa Amit Shah lo kal tur chu eng emaw rokhawlhna avangin a rawn \hulh leh. A rawn kalna tur chhan hi BJP-a ZPM-te baptist a tum vang nia hriat a ni,” tiin Amit Shah rawn kal hunah Mizoram BJP MLA pakhat chu deputy chief minister atan ZPM-ten an lakluh ngei a rinawm thu a sawi.
MPCC President chuan BJP chu Kristian nuai chimih tumtu an nih thu sawiin, “India independent kum 100 na thlenga rorelna hi an chelh a nih chuan sakhaw thlem zawkte tana thil hlauhawm tak a ni. BJP sorkar hian pawisak a nei lo hle. India rama election-a an hotupa ber chuan vote tam tak a lo paih a ni. India ram thalaite’n he thil hi lungawi lohna lan tirin tunah hian an pungkhawm mek,” a ti.
India ramah Congress Party nasa takin a thang chho mek nia sawiin Lal Thanzara chuan, “Kum 2029 a Lok Sabha inthlanpui lo awm turah Congress chu sang taka hnehna chang thei tur leh Rahul Gandhi ngei pawh prime minister ni turin India ram mipuite hian beiseina an nei sang hle,” tiin Mizoramah pawh Congress party-in nasa taka hma an sawn thu a sawi.