Congress Party hruaitute fak

MPCC chuan vawiin (21.9.2026) chhun khan an office-ah political session an hmang a, thusawitu MPYCC President Ngurdingpuia Pachuau chuan, “Kan ti ve lo ang tia tih leh vek lawi si te, kan ti ang ti a tih leh loh lawi si te hi tu hian nge ring duh tawh ang ni,” a ti.

MPYCC President chuan ZPM-te’n Zoram mipuite tiam theih zawng zawng min tiam tih sawiin, “Min phatsan leh si, rilru naa insawh hi Zoramah hian an va tam dawn tak em. Keini Congress Party pawn kan lo thlir ve reng a, an tiam ang leh sawi ang zawng zawng hi an tih theih dawn chuan a va tha dawn tak, heng hi an tihhlawhtlin theih dawn phawt chuan Zoram kan hmangaih a, sawrkar reng se a ni mai alawm kan lo ti rilru hlawm. Mah se, kum hnih leh thla kaw vel sawrkarna an han chelh hian an zia a lo lang chhuak a, beidawnna thlentu mai an ni,” tiin ZPM-te avangin politician-te tam takin an hmuh khaw loh a hlauhawm phah thu a sawi.

Mipui hian thil hi kan hre rei thei lo tih sawiin Ngurdingpuia Pachuau chuan, “Kan chhinchhiah reng peih lo a, hote ah kan lungawi leh mai thin. ZPM te kan thlan tlin chhan leh mipui hmaa an intiamna zozai te kha sawi dawn ila, en let leh lo chuan point 10 sawi chhuak thei pawh hi kan awm lo mai thei a ni. Kum 2023 inthlan hmaa mipuite min tiam leh a hnu lama mipui hmaa an sawite kha an tihlawhtling reng em? ZPM-ten CM leh president nih kawp thiang lo tia au dum dum nih kawp tha ti leh si, mahni leh mahni in debate thiam, dawt pawh confi taka sawi thiam an nei. MNF te lah an pu ber hi mumang a ngah thin deuh a, mark an hmu tlem deuh mai thei,” tiin Congress Party erawh an hotute tawngkam thiam hluah ni si lo, ti deuh churh, rinawm deuh tlut, belhchian dawl ru fu si hi an nih thu a sawi.

Rinawmna hi a tlo tih sawiin MPYCC President chuan, “Thutiama dingnghet thinte hian rin an hlawh thin. Thutiama dingnghet tlat thin, dawt leh tihhlawhtlin hleih loh tur leh dream(mumang leh suangtuahna) sawi ve ngai lo Congress party hi Zoram mipuite hian i ring ngam ang u, enchhin ngai lo hriatchian sa an ni. Tuna Mizorama political party lian pathum zinga hotu nei tha lawrlak niin, a mal te te a buk tawn pawha buk rit ber leh keu neuh neuh pawha belchian dawl ber tur hotu rual nei tha ber a ni. Kan ram leh hnam mamawh hria, mitin, chhungtin dinhmun chawisang tura innghahna tlak leh a ngaihna hria, thutiama rinawm tihdan phunga lo nei thin Congress Party hi Zoram mipui mamawh chhanna dik tak a ni e,” tiin a sawi chhunzawm.