CYMA hruaitute’n Union Home Secretary an kawm

Nimin (27.1.2026) tlai dar 4 khan Ministry of Home Affairs (MHA) Office, Kartavya Bhavan, New Delhi-ah Union Home Secretary hoin MHA official te leh Central YMA hruaitute an inkawm.

Meeting a tel tur hian MHA hian Central YMA hruaitu pali an sawm a, President R. Lalngheta hoin Vice President Prof. Lalnuntluanga, General Secretary Malsawmliana Gen.Secretary leh Treasurer H. Duhkimate an kal.

Union Home Secretary hova meeting ah hian MHA Official hrang hrang bakah IB hotute, Assam Rifles hotute leh BSF hotute an tel a; Mizoram Chief Secretary Khilli Ram Meena a tel bawk.

Meeting-ah hian, nikum March 15,2025 a Union Home Minister-in Mizoram a rawn tlawh tum a Central YMA leh NGO pawl dangten an thu thlen bawhzui a nih dan hrang hrang te sawi lan a ni Chung zingah chuan – ruihhlo dona atana Central YMA hnena NCB kaltlanga motor leina tur sum Rs. 88,95,675/- ruahman a nih tawh dan te, ruihhlo dona kawnga inzirtirna lama hmalakna tur cheng vbc. 2.3 ruahman a nih tawh thu te; Thingsulthliah rama YMA Conference Centre sakna tura cheng vbc. 99.7 dah a nih tawh thu te, 8th schedule-a Mizo tawng dah a nih theihna tura ngenna chu diltu 150-200 vel an awm avanga committee dinin an ngaihtuah tur thute sawi lan a ni.
Heng bakah hian Mizo thalaite tana Civil Service Coaching Centre buatsaih chhoh mek a nih thu leh AAI kuta Lengpui Airport hlan chungchanga thil awm dante sawilan a ni.

Indo- Myanmar Border Fencing chungchanga YMA ngaihdan zawh an nih angin YMA hruaitute chuan, NGOCC thu ding lai angin ramri hung hian Zofate inunauna a tihchhiat theih dawn avanga hung rih loh an duh thu leh, Mizoram State Assembly pawhin resolution a lo pass tawh a nih thu te; Indo- Bangladesh ramri hungah Mizoramin nasa taka ram a chan dan leh khaw engemaw zat hung pawna a awm dan te sawi lan a ni bawk.

Indo- Myanmar ramri hung turah hian survey neih mek a nih rualin ramri a cheng mipuiten ramri hungin a ken tel tur an hriat loh thu leh eng angin nge a nghawng dawn tih inhrilhfiahna a awm loh thu Central YMA hruaitute hian an sawi bawk. Tunah hian Indo- Myanmar Border Fencing atan BRO-in survey an nei mek a ni.