Blog

MHIP hruaitute chuan vawiin (6.8.2026) chhun khan Aizawl Press Club-ah thuthar thehdarhtute kawmin, Mizo hmeichhia, hnamdang pasal neih tum lo tam tak an awm thu an sawi.

Tunhnaiah Mizo hnam humhalhna a nasa em em tih sawiin MHIP hruaitute chuan, “Hnamdang pasal nei lo tura, inzirtirna pawh kalpui niin, a tha em em a ni. MHIP pawn, hetianga hnamdang pasal nei lo tura, inzirtirna hi kan kalpui nasa in, kan programme-ahte leh keimahni MHIP chhungah kan inzirtir nasa thin. Chutih lai chuan, thahnem ngaih vang pawh a ni ang, uchuak taka hmeichhiate deuhsawhna leh hnualsuatna, hmuhsit rawngkai leh ualau taka zilhna, hmuh tur a awm hi pawi kan ti tak zet a ni,” a ti.

MHIP hruaitute chuan Mizo hmeichhia fel tak tak, hnamdang pasal neih tum lo, hnamdang pasal nei lo tam tak an awm tih sawiin, “Chuvangin, Mizo hmeichhia han tih a, tawngkam dengkhawng tak tak leh hmeichhiate chauh thlur bika, hmalak hi a dik lo a ni. Kan zavaia kan tanrualna tur a nih avangin, tumah rilru na loa kan insiam a, tha taka kan tan ho thiam hi, a pawimawh in, kan hnam kan humhalhna kawngah hian, a hlawk zawk ngei ang,” tiin an sawi chhunzawm.

Hmeichhiaten tual thihna leh kut thlak, an tawrh hriattur a awm leh thin tih sawiin MHIP hruaitute chuan, “Mizo hmeichhiate kan rilru a nain, pawi kan ti tak zet. Nimin lawkah kum 15 mi Ramdinpuii, Mualthuam North khua chu, a ruang chhar a ni. Kan thu hriat danin, a taksaah vihna leh zaina hnuhma a awm tih a ni. Pawi khawihtu an awm anih chuan, man chhuah a nih thuai a, dan hnuaiah na taka hrem a nih ngei hi kan duh,” tiin hetiang tualthihna hi thleng tawh lo se an duhthu an sawi.