News

MNF chuan vawiin (14.9.2026) hian an office-ah chhung inkhawm an hmang a, thusawitu MNF President Zoramthanga chuan kum 2028 MLA inthlan hmaa an party inthlan dawn loh chhan a sawifiah bakah, inremna thuthlung chungchang pawh a sawi a, dawt a zawnga dawt lian ber sawiah CM Lalduhoma a puh.

Zoramthanga chuan ZPM chuan an party general headquarters inthlan an huphurh hle tih sawiin, “Inthlanna neih an tum lo a, vice president pawh eng emaw zat an ruat belh tawh. Congress pawh an inthlang dawn lo, vice president pawh an inruat belh zel. Keini pawh hi nakkum kan party inthlan hun a ni a, inthlang ta i la, elected OB thar, NCC, PAC, adviser, GS, secretary leh frontal zawng zawng a vaia inruat thar a ngai dawn. Promotion beisei nei mi tam tak kan tikhaih lak thei. Term dangah pawh kan lo tih thin fo tawh angin, party inthlan chu MLA election dawn a ruaiah kan nei ngai lo a, MLA inthlan zawh hunah kan nei zawk dawn a ni. Party dang pawhin an ti vek a, keini pawh kan constitution-in President thuneihna a pek angin hetiang hian kan party chak leh zuala a kal theih nan kan inruat thar a ni,” a ti.

MNF President chuan kum 1986 June 30-a inremna kan neih chhuanawmzia chungchang sawiin, “Mizoram mipui tan chhinchhiahtlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin min ngaih hlutsak hle a ni. Kan inremna kha min beituten tun hma pawhin sawinep sak min tum thin a, mipuiin an awih duh lo a, an sim hman viau. Mahse, tun hnaiah Pu Duhoma hian MNF tih chhiat theihna kawng awm chhun nia a hriat vangin a rawn phawrh leh a ni. ‘MNF leh Home Ministry sign’ a ti. India Sorkar leh mipui aiawhin Union Home Secretary RD Pradhan chuan a sign a, Mizoram sorkar, mipui aiawhin Chief Secretary Pu Lalkhama’n a sign. MNF aiawhin Pu Denga’n a sign a, hmuh theihin document dik tak a la awm vek. Pu Duhoma hian dawt a zawnga dawt lian ber a sawi. Kha tiang a sawi avang khan beitu a ngah tan viau a, a zuzi nan thil chi hrang hrangin a sawi kual hnan leh a ni,” a ti.

Kum 2006 khan Chief Minister a nih laiin Prime Minister Manmohan Singh leh Union Home Minister Shivraj Patil chu Aizawlah remna lawmna a lo tel tura a sawm thu sawiin Zoramthanga chuan, “Anni chuan official takin lehkha ziakin min rawn chhang let. Mizoram history a chuang tlak inremna document puitling a ni a, Mizo mipuiten hnam an hmangaihzia an lantir a. India ram hruaitu ropui Prime Minister Rajiv Gandhi tih te, Mizo hruaitu ropui Pu Laldenga tih hmingte pawh an ziak tel. Peace sccord hlawhtling ber leh chhinchhiah tlak a ni a, development pawhin nasa takin a tanpui dawn che u a ni tihte pawh an ziak a, document kan la kawl vek a ni. Pu Duhoma hian ‘Inremna tlar tinah ka tel ve a ni’ a tih kha, a tel lohna zawng zawngah pawh lan ropui duhin tel angin a insawi vek a, kha tih lai khan Pu Duhoma hi sawi rik a ni ve lo hrim hrim,” a ti.