Nimin (12.10.2026) tlai dar 4 khan Finance Department (Fiscal Management Wing) te chuan Finance Secretary Ramchuana hoin IFMIS tihchangtlun nana module thar pahnih – Pension Module leh e-Voucher Module te chu hawn belhin Employee Module Version 2.0 (e-HRMS) an hawng nghal. Finance Secretary chuan hetiang ang hmalakna Mizoram sawrkarin a kalpui chu hmasawnna ropui tak a nih thu a sawi a ni.
Ramchuana chuan khawvel changkang chho zelah financial management system chu a pawimawh chhoh zel a tur thu sawiin, “e-Voucher Module hian thla tina Accountant General office-a accounts thehluh hun a tih hma ka beisei. Compilation-ah nasa takin hmasawnna a thlen tawh dawn avangin a lawmawm hle,” a ti.
Pension module chungchang sawi zauvin Finance Secretary chuan, “Manual-a pension paper process a nih tawh dawn loh avangin pension a hun taka pekchhuah kawngah mipui tan a tangkai a rinawm,” tiin chutiang bawkin employee module chu tihchangtlung zel a nih chuan rah tha a chhuah ngei a beisei thu a sawi a ni.
Finance Department FAO Esther Lalremruati chuan technical report pe in module thlirho nghal a ni. Heng module-te hi thla tam tak buaipui an lo nih tawh thu sawiin, sawrkar system awm sa – SPARTAN leh e-LAMS te chu IFMIS nena inthlunzawm (integrate) an nih avangin tun tum module-te chu an hlut lehzual thu a sawi a ni.