Oct 23, 2026
Friday
Education Minister-in hmanpui
Education Minister Dr. Vanlalthlana chuan vawiin (23.10.2026) hian Mizoram Primary Teachers’ Association (MPTA) General Conference, Dawrpui Multipurpose Centre-ah a hmanpui. School Edcuation Director Pi Angela Zothanpuii chu khual zahawm a ni.
Education Minister chuan text bu indaih lohna chungchang sawiin, “Kumin atangin chinfel a ni a, nakkum lama sem tur pawh buaipui chhoh a ni leh tawh a, a hun taka sem leh theih ngei tum a ni. Pawl 5, primary section-a dah chungchang pawh ngaihtuah reng a ni. A room tur lam tihfel hmasak a ngaih avangin tih puitlin mai theih a la ni lo a, a room siamna tur hi kawng hrang hrang atangin ngaihtuah reng a ni. Tunah hian school 100 chuang sak thatna tur tender tichhuah a ni a, teacher quarter pawh CM scheme atanga saktheih dan zawn a ni,” a ti.
Central lam atanga zirlai piah lam activity tam lutuk pawh Ministry lamah sawi a nih thu sawiin Dr Vanlalthlana chuan, “Kan lo tih ve ngailo ang chite inhrilhhriat zel niin, a tlem chho zel niin a lang. School calendar thlak avangin harsat tenau deuh kan tawk ngeiin a rinawm a, mahse thil tha zawk nei tur chuan harsatna tawrh a ngai fo thin,” tiin tuar hram hram turin a fuih.
MPTA General Conference hi an pawl president Rosangzuala’n kaihruaiin, resolution pahnih Hindi hi national language a nih ang a, primary school atanga naupangten an zir theih nan sorkarah thlen ni rawh se tih leh primary school zawng zawngah computer set kan neih vektheih nan sorkarah thlen ni rawh se, tih chu an pawm a ni.
