Blog

Lalliantluanga (66) h/o Lalnunziri, Maubuang chu vawiin (7.2.2026) chawhma dar 11 vel khan electric current man vangin a thi.

Lalliantluanga hian kar hmasa khan a ui a lenchhuahpui a, ui hi kawng sirah petekin a bo zui a ni. A theih ang angin a ui hi a ngaihven zui a, vawiin pawh hian tleirawl pakhat nen ui zawng hian an chhuak.

Maubuang khaw chhung atanga hnaiteah thil uih rim an hria a, Lalliantluanga hian enfiah tumin thil uih rim an hriatna lam chu a pan a ni.

Kawngpui atanga hnai teah thil uih rim an hriat chu a zawng a ni. Hnim buk a haikianna lamah electric ban pawhna hrui khawih fuhin, electric current hian a lo man nia rin a ni. A kut dinglam zungtang pali a bung.

Electric ban leh a pawh nghehna hruiah hian current a kal nia sawi a ni. A ui pawh hi electric ban hian a man hlum nia hriat niin, electric ban bulah hian thiin a lo awm a, a chhe tawh hle.

Lalliantluanga ruang hi ZMC-ah postmortem tur a ni. Amah hi Mission Veng mi niin, a nupui hnathawhna Maubuangah hian an awm. A ruang hi Mission Veng panpui phawt a ni dawn a, chumi hnuah Maubuangah lak tur niin, naktuk chhun dar 12 ah vui a ni ang.