News

Ni 22.09.2026 (Thawhlehni) chawhnu dar 2:00 khan Power & Electricity Minister F. Rodingliana hoin a officer-ah tun hnaia electrical accident thleng chungchang leh tun hnuah accident a thlen tawh loh nana hmalak dan tur ngaihtuahin department official-te an thukhawm.

Meeting-ah hian tunhnaia division hrang hranga electrical accident thlengte a thlen dan report kimchang a bialtu Superintending Engineer theuhten an pe a, report-te ngaihthlak a nih hnuah accident pumpelh a nih theih nana hmalakna tur hrang hrangte rel ho nghal a ni. Power Sub-Station tam taka hmanraw hlui tawh lutuk avanga ‘control and protection’ bungraw thenkhat hnathawk tha thei tawh lote thlak vek rel a ni a, heta tan hian a tul angin sum ruahman nghal a ni ang. Tin, thawktu indaih loh lutuk avanga harsatna awmte pawh tarlan niin, a tul anga sawrkar lama bawhzui rel a ni.

Hmalakna tura hmachhawp zingah department-in electricity safety procedure chungchang hraittirna a lo chhuah tawh chu chhuah nawn leha zau taka puan zar ni se, he safety procedure hi zawm ngei a nih theih nan khauh zawka dan lek kawh ni se. Tin, thawktute leh vantlang mipui te awareness nasa zawka pek rel a ni a, khaw tina Seva Setu Campaign hman thinah Electrical Safety Week hman tel nise, tih a ni.

Electrical license contractor-te kohkhawm a, awareness pek nawn leh rel a ni. Hei bakah hian thawktute zinga muster roll employee, provisional employee leh casual labourer te chu accident tawh palha lukhawng leh zangnadawmna tha zawk an hmuh theihna tur ngaihtuahsak turin an rel.