Blog

Sumdawng pawl intelkhawm Mizoram Merchant Association (MIMA) chuan vawiin (13.10.2025) hian Lammuala neih mek 1st International Star Expo titawp tura ngenna Aizawl DC leh Aizawl Police Station-ah an thehlut.

MIMA chuan tukin khan an office-ah emergency meeting neiin, 1st International Star Expo lammuala neih mek chungchang an sawiho a, expo-ah a buatsaihtute hian dan leh dun an ngaipawimawh lo leh advertisement an tar ang hian an kalpui lo hle niin an hriat.

Hetianga dan bawhchhia a vawiin ni thlenga expo buatsaih hi tih tawp a la nih loh avangin MIMA leh MZP te chuan an ngaithiam lo hle tih tarlangin MIMA chuan, ‘Heti chunga he expo hi hawn zel a nih a, buaina emaw harsatna emaw an tawk a nih pawhin MIMA leh MZP chuan mawh an phur lo ang,’ an ti.

MIMA chuan expo hi a rang lama ti tawp tura ngenna Aizawl DC leh Aizawl Police Station-ah an thehlut nghal a ni.
MIMAL tarlan :

1. Central Consumer Protection Act 2019 Section 89-in a sawi angin he expo hian advertisement-ah leh banner-a an tar angin ‘1st International Star Expo’ tiin tar ani a, hei hi Central Consumer Act 2019, Section 89 bawhchhiain misleading/false advertisement a ni. Hei hi danin hremna a phut chuan nuai tam tak chawi leh kum tam tak jail tan theihna a ni.
2. Food Safety Licence nei loin Delhi Kitchen tih hmangin ei leh in siam a ni. He license hi ni 20.02.2021 a thi tawh a niin, kum 4 lai a thi tawh. Hei pawh hi FSSAI dan kalh tlat a ni.
3. ILP an neih dan MZP leh MIMA-ten ni 10.10.2025 khan he expo hi a lo check tawh. Invalid ILP 36 lai man an ni a, police-ah pek an ni.