Sep 07, 2026
Monday
Vawiin (7.9.2026) hian National Programme for Blindness & Visual Impairment, NHM bultumin Eye Donation Fortnight vawi 41-na chu Taxation Department Auditorium-ah hman a ni a, Health Principal Director Dr Lalthlengliani’n a hmanpui.
He huna tarlan a nih danin, Civil Hospital, Aizawla Mizoram Eye Bank-ah mit donate tum in register tawh mi 9,312 leh mit dawng tur in-register hi mi 400 an awm tawh. Thih hnua mit pe tawh chu mi 632 an ni. Kumin National Fortnight on Eye Donation hun chhunga mit donate phal, pledge chhang zawng zawng nen chuan mi (9312+33) 9,345 an awm tawh a; mit donate, pledge chhang duh hi mi 20 chin an awm chuan a hmunah thawktuten an pan thei reng a ni. Hrechiang duh tan 0389-2324564 (Toll Free) ah hian zawh chian theih a ni.
He programme hmang tura sawm Govt. Higher Secondary School leh MICE school naupang lo kalte atangin mit donate tura thu tiam 33 an awm. Kum 2025 – 26 chhunga mit pe mi 67 chhungte hnenah chawimawina thuziak (crtificate) sem chhuah a ni. Kum 2026 – 2027 chhungin, July thla thlengin mit darthlalang (Cornea) hi 42 lak ni tawhin mi 23 thlak sak an ni tawh.
Khuallian Dr. Lalthlengliani chuan eye donation chu kan thih hnua kan mit darthlalang (cornea) mi dangte tana mit varna a lo nih theihna tura pek a nih thu sawiin, “Mizoramah July 31, 2008-ah Eye Bank hawn a ni a, September 25, 2009 ah Corneal Transplant hmasa ber hlawhtling taka neih a ni. Central Sorkar ruahmannain kum tin Eye Donation Fortnight (25th August to 8th September) hman thin a ni. Mizoramah pawh midangte tana malsawmna ni turin mi tinin ṭan kan lak lehzual a tul a ni,” a ti.
Civil Hospital, Aizawl, Eye Specialist Dr. Zoremmawii, chuan PowerPoint presentation hmangin Eye Bank hnathawh hrang hrang te, mit donate dante leh a him thute a tarlang a, kalkhawmte mit donate zel turin a sawm.
