Gauhati High Court Judge atan ruat

Ministry of Law & Justice Department of Justice (Appointments Division) chuan vawiin (8.9.2026) hian Nchumbemo Mohui leh Helen Dawngliani te Gauhati High Court Additional Judge atana President-in kum hnih chhung atana a ruatna notification a ti chhuak.

Ni 8.8.2026-a Supreme Court Collegium thukhawm chuan Gauhati High Court Judge atana Nchumbemo Mohui leh Helen Dawngliani rawtna a pawmpui a, vawiin ruat an nihna notification a chhuak ta a ni.

Hriat theih chinah Mizo zingah Gauhati High Court Judge-ah hian T Vaiphei, Michael Zothankhuma, Nelson Sailo leh Marli Vankung te an tang tawh. T Vaiphei leh Marli Vankung chu an pension tawh.

Helen Dawngliani hian May 24, 2011 khan Mizoram Judicial Service hna a zawm a, thiamna lamah BA (Hons) LLB a ni. Additional District & Sessions Judge hna hi Aizawl leh Lunglei District Court-ah a lo thawk tawh a, Gauhati High Court-ah Registrar ni tawhin, Secretary to the Government of Mizoram, Law & Judicial Department (April 2021-July 2024) hna a lo chelh tawh.

Tin, Government Advocate-cum-Additional Public Prosecutor hi Gauhati High Court, Aizawl Bench-ah a lo thawk tawh bawk.