Hmalak dan tur sawiho

Nimin (October 3, 2026) chawhnu dar 3:30pm hian MNF Senior Vice President Dr. R.Lalthangliana, MLA chuan Ex-Mizo Army Association (Ex-MNA), Peace Accord MNF Returnee’s Association (PAMRA) leh Mizoram Under Ground Returnees Association (MURA) hruaitute chu a chenna in a kawm a, hmalak dan tur leh thu pawimawh hrang hrangte an sawiho.

Meeting-a telte hian kum 1966 atanga kum 1986 inkara Mizoram tana zalenna sualtu Mizo hnam sipaite kha an chungah Lalpa mit a fu bik tih an sawi a, inremna ṭha tak an nei thei leh state ralmuang ber kan ni thei chu lawmawm an ti. Mizoram tana zalenna sual ṭheuh ṭheuhte chu Kristianten Lal Isua Krista lalah an pawm ang hian, MNF Party-ah lungrual taka thawkho mai tur an ni tih an sawi.

Bawm pakhat zawna intungding leh tura theihtawp an chhuah tur thu an sawi a, lungrual taka hma la a, thawhhona leh inpumkhatna tha zawk nena kal zel an tum a ni. Heng pawl pathumte hian thawhhona tha tak ‘Co-ordination Committee’ lungrual takin an lo din tawh a, MNF tan theihtawpa hmalak leh thawhho zel an tum thu sawiin, “Zalenna sualtu kan ni a, political party dang leh pawl dangte nen ang khata en chi kan ni lo,” an ti.

He hun hi Co-ordination Committee Chairman Vanlalbiaa chuan a kaihruai a, MNF Working President Tawnluia leh MNF NCC Member K.Vanlalauvate pawhin telpuiin, zanriah an kilho nghal.