News

October, 2026: Asian Games 2026 zawh taka Mizoram aṭanga gold medalist pahnih – hockey player Lalremsiami leh Lalthantluangi-te hmuah dan tur chu vawiin (3.10.2026) hian Sports Minister Lalnghinglova Hmar hoin a office-ah sawrkar hotute leh sports association aiawhte’n an rel.

Lalremsiami leh Lalthantluangi te telna India hmeichhe hockey team chuan nimin khan Asian Games 2026 final-ah China hnehin an champion a, Lalremsiami hian final-a goal awmchhun leh champion-na goal mawi tak a thun nghe nghe. Ruahman ang chuan October 5, 2026 (Thawhtanni)-ah Lengpui Airport an lo thleng dawn a, airport-a lo hmuah bakah a lawmna pui ber chu Chief Minister Lalduhoma hoin R. Dengṭhuama Hall, Mualpui Salem Vengah October 5 chawhnu dar 3:00 aṭangin neih tura rel a ni. Lawmna programme-ah hian a duh apiang tel turin sawrkar chuan a sawm a, kal turte chu chawhnu dar 2:30 ah R. Dengṭhuama Hall-a thlen hman tur a ni ang.

Sports Minister Lalnghinglova Hmar chuan, “Lalremsiami leh Lalthantluangi te hi Mizo zinga Asian Games-a gold medal mai ni lo, medal hrim hrim la hmasaber an nih avangin thil hlu bik a ni. Sawrkar pawhin a ngaihlu a, ropui taka lo hmuaha lawmpui a duh. An champion piahlamah Olympic 2028 khel tura an tlin nghal avangin a hlu lehzual a ni” tiin Sports Incentive Cash Award Scheme hnuaiah cheng nuai 25 ve ve an dawn tur thu a sawi.

Meeting chuan Lalremsiami leh Lalthantluangi ṭhiandun hi Lengpui airport-ah Deputy Speaker Lalfamkima hoin sawrkar leh sports association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhte’n lo hmuah nise tiin a rel. Asian Games gold medalist leh anmahni hmuaktute chu Lengpui Airport aṭangin chawhnu dar 1:30 vela rawn chhuakin, Hunthar peng aṭangin Chanmari lamah an kual chho ang a, Treasury Square aṭanga Republic Veng leh ITI veng kaltlangin R. Dengṭhuama Hall an pan dawn a ni. Heng kawng dunga mipui awmte chu an awmhmun ṭheuhah Lalremsiami leh Lalthantluangi te lawmna lo lantir turin ngen an ni.

Chief Minister hova R. Dengṭhuama Hall-a lawmna hunah hian Minister leh MLA, sawrkar official pawimawhte leh sports association zawng zawng aiawh, MOA, USAM, Thenzawl Hockey Academy, SAI Training Centre Aizawl leh Khelo India State Centre of Excellence (KISCE)-a training te, Mizoram Journalist Association leh NGO hrang hrang (YMA, MHIP, MUP, MZP, MSU) aiawh te, college zirlaite bakah a duh apiangte tel tura sawm nise tih a ni.