News

Home Minister K Sapdanga chuan vawiin (26.9.2026) hian tun hnaia India sipai tanglai, mi kut tuara thi Zakaria Lalhriattluanga chu an khua New Builumah a ral a, TBC Lalvenchhunga MLA (Adviser to CM Finance) leh Lt.Colonel Clement Lalhmingthanga Champhai South bialtu MLA te bakah ZPM General Headquarters hruaituten an ṭawiawm.

Ralna hun hi New Builum khua Zakaria Lalhriattluanga chenna inah neih niin New Builum VCP Lalrintluangi’n a kaihruai a, K Sapdanga’n Zakaria thihna chungchangah sorkar hmalakna leh an ui zia thu a sawi.

Home Minister chuan, “Vawiin a Zakaria Lalhriattluanga, India sipai ṭanglai tlangval fel tak mai kan ralna hi sorkar anga kal kan ni lova, a boral dan khan Mizo mipuite rilru a ti na a, keini pawh min thawng hle a ni. kan thinlungah a tlak nat em avangin Mizo kan nihna angin ralna hun hi kan rawn hmang a, thianho hun nei remchangte nen insawmkhawmin kan ui zia leh sun zia lan tirna atan an chenna in ngeiah ralna kan rawn hlan a ni.

Zakaria a boral tirh khan sorkar anga hmalak theihnaah rang takin hmalak zui nghal a ni a, hemi kawngah hian kan police-te an fakawm hle. A boral atanga darkar 3 liam hmain pawikhawitute hi man an ni nghal a, khawtlang hruaitute leh tlawmngai pawl te atangin thawhpuina an dawng tha hle bawk a ni. Hriat tur ṭul awm ang zawng zawngte kan hre kim thawkhat tawh. Dan in a phut angin ni 90 chhunga court-a report pek tur tih pawh tun thla chhung hian kan peih vek hman dawn a ni,” a ti.

Zakaria Lalhriattluanga nu leh pa kutah Zakaria ralna sum ₹ 20000 chu TBC Lalvenchhunga’n a hlan a, Home Minister hi Kolasib SP Lalrinpuia Varte, New Builum khawtlang hruaitute leh tlawmngaipawlten an lo dawngsawng a ni.