Iron rod chungchangah thuchhuah siam

Controller Legal Metrology, Govt of Mizoram-in thuchhuah a siam angin Mizoram chhunga iron rod lakluh leh zawrhte hi a standard size aia te a tam tih hriat a ni.

Hetiang rod standard tling lo hman hian sawrkar leh mimal insakah nasa takin a tha lo zawngin a nghawng thei a ni. Chuvangin, Section 10 of the Legal Metrology Act,2009 leh Clause 10 of the Mizoram Legal Metrology (Enforcement) Rules, 2026 in a sawi angin Controller, Legal Metrology, Govt. of Mizoram chuan mipuiin rod standard dik tak an lei theih nan iron rod zuar reng reng an rod zawrh laite a buk chauhvin zuar turin a hriattira, iron rod standard size dik lo Mizoram chhungah an la lut tur a ni lo.

Iron Rod zuarte chuan an thil zawrhte bukna atan Electronic Weighing Machine an kawl anga, heng an bukna te hi Legal Metrology-in an endik leh certificate an pek chauh an hmang thei ang. Buknate hi customer-te endik an phalsak tur a ni, buk tling chauh an pe chhuak tur a ni. Dan bawhchhiate chu an bungruate mansak theih an ni a, Section 28 of the Legal Metrology Act, 2009 in a sawi angin dan bawhchhiate chu a vawi khatnaah Rs 50,000/-, a vawi hnihnaah Rs 1,00,000/-, a vawi thumnaah leh an tihsual apiangin Rs 2,00,000/- chawitira hrem theih an ni.

Iron rod zuarte chu an insiamthat hun atan October 2026 thleng phalsak an ni a, hemi hnua dan bawhchhiate chu dan angin hrem an ni ang. He order hi Mamit District chhungah pawh kenkawh a ni ang.