News

MNF General Headquarters-in Aizawl South III North Block tlawhchhuah program, Melriat Community Hall-a neih a hmanpuinaah MNF Working Prezident Tawnluia chuan an party an insingsak mek thu sawiin, nationalism chawinung duh thalaite MNF-a lut turin a sawm.

Tawnluia chuan MNF party an insingsa mek a, um 2028 MLA election lo awm leh tura MNF Party-in hnehna chang a, ram rawng a bawl leh theih nan an inpeih tawh tih sawiin, “Mizo nationalism chawinung zel turin MNF Party chu a lo kal tawh angin a kal zel dawn,” tiin Mizo nationalism chawinung duh thangthar zawng zawngte MNF Party-a lut tur a sawmin, kum 2028 MLA Election lo awm turah pawh thalai zawkte tan hmun zau zawk a awm tur thu a sawi a ni.

Policy and program chungchang sawiin MNF Working President chuan, ” MNF Party chhungah a buaipuitu mithiam leh hawi zau zawk ten uluk takin ruahmanna siamin committee vawi duai lo an thu reng. Kum 2028 election-a Pathian leh mipui zarah MNF-in hnehna a chan theih huna ram hmasawnna tur atana policy and program an duante hi a hlu hle dawn a ni,” a ti.

ZPM chungchang sawiin Tawnluia chuan, “ZPM chu lungrual tak tak lo, awmkhawm duh si awmkhawm thei si lo pakhat ang a lan tum, pawn lam a tuam pum a chhung khi reng si an ni. Enchhin tur a inzuar, enchhin dawl si lo an ni,” tiin tunah chuan kum 2023 a enchhin tute khan sawrkar nawn tir an chak tawh loh thu a sawi.