Kawngpui an dang dawn

Mamit All NGO leh Commercial Vehicle, Association tangkawp chuan Mamit Distict kawng a chhiat lutuk avangin October 16, 2025 atangin tiamchin awm loin kawng an dang dawn.

Mamit All NGO leh Commercial Vehicle, Association tarlan danin, ni 3.10.2025 a an thuthkhawm tumin Mamit District tana châk lakna leh veivahna motor kawngpui pawimawh Mamit to Aizawl, Mamit to Bairabi leh Mamit to Zawlnuam te chu lirthei eng chi tan pawh kal hleih theih loh khawpa chhia chu pawi tiin, chhuanlam ho te te siam tawh loa a rang thei ang bera siamthat a nih theih nan Mizoram Sawrkar chu thuchhuah siamin a lo ngen tawh a ni.

Ni 4 – 12 chhung sawrkar hmalakna nghakin an lo ngaichang a, sawrkar hmalak dante a hmun ngeiah kalin enfiah a ni. He hmalakna leh ngenna hi sawrkarah beiseina sang tak nei a, an thlir mek laiin hmalakna mumal leh beisei anga hnathawh a awm lo.

An din hmun hetiang hi a lo nih tak avangin nizan (13.10.2025) a an hmalak zel dan tur an relnaah kawngpuite hi sawrkarin siam tha tura a taka hma a lak sak hma loh chuan ni 16.10.2025 atangin heng kawngpui – Mamit to Aizawl, Mamit to Bairabi leh Mamit to Zawlnuamte hi tiam chin awm loin eng lirthei mah kal tlang theih loh tura dan chah an rel a ni.

Mamit District mipuite hetianga hma lak angai ta mai hi a pawi kan ti a, kawng hrang hranga harsatna thleng thei lakah mipuite hriatthiamna leh thlawpna an ngen.