News

MPYCC chuan thuchhuah siamin, ni 21.9.2026 (Thawhtanni)-a ZPM chhung inkhawma ZPM hruaitu thar puannaah Chief Minister Lalduhoma’n an party kal dan mumal lo lutuk sawi mamna atan, ‘Pathian meuh pawhin thuthlung a thlak fo thin a. Lal Isua ngei pawhin ngaihdan a thlak fo bawk’ tia a sawi thu tarlangin, “Kohhran zirtirna leh thurin palzutna dik takah kan ngai. Hetianga Kristian state-a ram hruaitu lu berin a sawi hian India ram kohhran hrang hrang thurin leh Presbyterian Kohhran thurin (doctrines) II-naa, Pathian chu a miziaah te, finnaah te, thiltihtheihnaah te, thianghlimnaah te, diknaah te, thatnaah te, taknaah te leh hmangaihnaah te tawp chin nei lo, chatuan mi, danglam ngai lo a ni, tih kan inzirtirna kalh tlatah kan ngai a ni,” an ti.

Pathian chu a chungnunga, a duh ti turin a zalen a, a Lal a ni tih tarlangin MPYCC chuan, “Party pakhat president dinhmun inthlakthleng sawifiah nana Pathian hman hi kohhran upa tih a tan phei chuan thil mawi lo tak a ni. Kan kohhran kalhmanga Pathian kan hmuhndan a kalh a ni. Mizoramah ram enkawlna hna tha taka thawh tumin, party hrang hrangin kan tihtur leh tih loh tur te mipui hriat turin kan sawi hlawm. ZPM phei chuan an tih ve hlek loh tur, an MLA candidate-ten Pathian leh mipui hmaa dingin, chhechham meuha intiamin, ‘min enchhin rawh u’, an ti a ni. Hetiang avang hian mipui pawhin beiseina sang tak neiin kan thlang tling. Mahse an intiamna ang an bawhchhiat fai vek avangin, in sawimamna atan kohhranin min zirtirna pawh a ni lo zawnga kaihlek a, Pathian meuh pawh danglam mai mai, Isua Kristia pawh ngaihdan thlak mai mai thin, a tih loh tur ti leh hnuhnawh thin anga a sawi mai hi kohhran thurin leh zirtirna pawisak lohna leh palzutnaah kan ngai a ni. ZPM sorkar hnuaiah kan sakhua, kan hnam leh kan ram him loh zia lantirtuah chuan kan ngai,” tiin a rang thei ang bera kohhran leh mipui hnena ngaihdam dil turin Lalduhoma an phut.