Kut hnathawktute kut durh a thlawn lo

Lunglei West ZPM Joint Block Conference chu vawiin (25.9.2026) hian Buarpui Community Hall-ah an hmang a, an hun hmanpuitu ZPM President Lalduhoma, Chief Minister chuan kut hnathawktu kut durh a thlawn loh thu a sawi.

Chief Minister chuan kalphung thar leh kalphung hlui inan lohna sawiin, “Kalphung hluiah chuan kut hnathawktute thlai thar a tawih ral mai ni loin CM motor meuh rah chhiat turin, kawngpuiah an zam nghek nghuk a ni. Kalphung tharah chuan kut hnathawk taima apiangin an thlai thar rate hre sa-in an hralh par par thei ta hi, a lawmawm em em. Kum kha leh chen ka vahvaihpui rate hresa-a thlai thar hralh chhuah ka tihfo thin, a taka kan sawrkarin kan kalpui thei hi ka lawm em em a ni,” a ti a.

Sawrkar kal liam tawh ten, thlai hrang hrang min chintir fo thin tih sawiin Lalduhoma chuan, “A hralhna kan hriat miau loh avang leh a market sawrkarin a ngaihtuahpui loh avangin, mi rethei kut hnathawktute an beidawngin, an kut a durh thlawn fo thin. Tunah erawh chuan kuthnathawktuten an thlai thar chhuah, an chem tah hriam atangin a rate hre sa in an buaipui ta mup mup,” tiin ZPM sawrkarah kut hnathawktute kut a durh thlawn ve ta lo a, an thawhrah atanga sawma pakhat an pek zozaite chanchin tha hrilna ropui tak a nih thu a sawi.