Lalrinpuii a che chhuak

Health Minister Lalrinpuii chuan a department chana Mizoramin hma a sawn zel theihna atan nimin (17.10.2025) khan Geneva, Switzerland-ah World Health Organisation hotute a kawm.

Lalrinpuii hi Doctors Without Borders (Medecins sans Frontiers) hotu Marie Elosabeth, Humanitarian Representative to the United Nations in Geneva, chu a office-ah lengin Mizoram ah zau zawka thawhho dan tur a sawipui.

Doctors Without Borders hian Lawngtlai leh Champhai District-a raltlante tan health sector hnuaiah project an lo kalpui tawh thin a, tunah pawh Zokhawthar ah raltlante tan hriselna kawngah nasa takin hma an la mek a ni,

Health Minister chuan Mizoramin HIV/ Aids dona kawngah pawh thawhho puiah sawmin, MSACS hmalak mekna tichak tur leh AIDS veite enkawlna kawngah leh invenna kawnga tanlak pui turin a ngen.

Mizoram chu India ramah population chhuta cancer natna vei tam ber kan nih thu sawiin Lalrinpuii chuan zirchianna neihsak turin a sawm.

Doctors without Borders hotu chuan Africa ramah CAB-LA (Cabotegravir Long-Acting) program hmanga HIV darhzel tur venna kawnga hlawhtling taka hma an lo lak tawh dan sawiin, Health Minister ngenna chu theih ang tawka an lo bawhzui tur thu a sawi a, Mizorama an project kal zel naah sawrkar support tha tak an dawn thin avangin lawmthu a hrilh.

Health Minister hian WHO Geneva Office dawr lehin Consultant Soma a kawm a, Mizoram chu India ram kilkhawr taka awm a nih thu leh a bikin thingtlanga chengte zingah nu leh naupang hriselna dinhmun ala tha tawk lo hle tih a sawi a, WHO in Mizoram a Health Department tichak tura a hmalak mekna Immunization, nu leh naute hriselna leh khawtlang mipui hriselna (public health) ahte WHO-in a puih thinnate chu lawmthu sawiin, hei aia nasa lehzual zawka Mizoram a rawn thawk turin a sawm.