News

Leitlangpui Music Festival (LMF) 2026 Organising Committee chu vawiin (2.9.2026) hian an chairman, Tourism Minister Lalnghinglova Hmar hoin a office-ah an thukhawm a, Tourism Department-i’n mawh la bik tura a ruat event management agency (EMA) ‘BBY Animals’ aiawhten ruahmanna an siam dan report an pek ngaihthlak hmasak niin, inbuatsaihna kalpui dan tur uluk taka sawiho a ni .

Ruahman lawk dan chuan November 11 – 13, 2026 chhungin Leitlangpui Music Festival hi neih tur a ni a, a nghahna hmun tur hi Lunglei High Powered Committee (HPC) Vice Chairman V. Malsawmtluanga, MLA hoa thlan nise tiin an rel.

Lalnghinglova Hmar chuan a vawi thumna atana LMF buatsaih tura ruahmanna kalpui ṭan a ni chu lawmawm a tih thu a sawi a, “LMF hmasa pahnihah pawh hmasawnna tam tak hmuh tur a awm a, a vawi hnihna nikumah phei chuan Mizoram pawn aṭangin rock band an rawn tel hial a, phai lam media-te beng pawh thlengin Mizoram hming a ri ring hle. Hetiang festival lian tham buatsaih hi a hautak bakah Mizoram pum huap a nih avangin Tourism Department mai ni lova, department hrang hrangte organising committee-ah telin phur taka an thawkho ṭhin chuan he festival hlutna hi a pholang chiang hle,” a to.

Leitlangpui Music Festival, 2026 Organising Committee-ah hian sawrkar department hrang hrang – Home, PWD, P&ED, PHED, Health & Family Welfare, Commerce & Industries, Art & Culture leh IPRP&S te an tel a, Lunglei Bawrhsap chu a hmuna engkim lo buaipuia ruahmanna kalpuitu tur a ni ang.