Lirthei tlan lo turin hriattir

Mizoram Tipper Association (MTA), District Headquarter’s, Kolasıb leh Joints Action Committee (JAC) tangkawp chuan October 23 zing dar 7 atanga October 26, 2025 tlai dar 4 thleng Vairengte to Sairang, Bairabi to Kolasıb leh Kawnpui to Durtlang Road-ah lirthei eng chi mah tlan lo turin an ngenin, an hriattir.

MTA leh JAC nizan (19.10.2025) a thukhawm chuan Vairengte to Sairang leh Bairabi to Kolasib inkar kawng chhia chungchanga an sawiho a, ni 11.10.2025 a thuchhuah an lo neih tawh bawhzuiin, ‘Tun dinhmunah Mizoram chak lakluhna kawngpui Vairengte to Sairang leh Bairabi to Kolasib inkar chu hnawh mek/thawmthat mek ni mah se, an hnathawh a chak tawk lo hle. Tun anga an kal reng a nih chuan Mizoram chak lak luhna kawngpui pawimawh tak tak \te chu kumin mai pawh ni loin, nakkum fur hma pawhin an siam zawh a rinawm lo tih a lang reng mai. Kum 2026 ah phei chuan tunaia nasa a he kawngpui pawimawh tak mai hi a chhiat nasat a rinawm,’ an ti.

NHIDCL leh state sorkarin tunaia chak zawk a, kawng repair hna hi thawk ngei se an duhthu tarlangin, ‘Helai kawng hi sub-grade atanga siam tur leh thawk ngei turin NHIDCL leh state sorkar kan phut tak zet zet. Hna chak taka an thawh theih nan leh kawngpui pawimawh tak mai ngaihthah em avangin lirtheia ei zawngten an lungawi lohna lantir nan tunkar October 23 zing dar 7 atanga October 26, 2025 tlai dar 4 thleng Vairengte to Sairang, Bairabı to Kolasıb, Kawnpui leh Durtlang Road-ah lirthei eng chi mah tlan lo turin kan ngenin, kan hriattir,’ tiin kawngpui tha an duh avanga an nawrhnate Mizoram mipuiten kan vai atana tha zawk tur a ni tih hria a, thlawp tlat turin an ngen.