Lokayukta-in eirukna a hmu lo

October 1, 2026 khan Mizoram Lokayukta chuan Finance Department-in ni 22.10.2025-a hna 41, cheng vaibelchhe 328 vel man hu leh hna 76, cheng vaibelchhe 6.29 chuang ni 17.04.2025-a restricted tender hmanga a pawm chungchanga thubuai chu ching felin, a khar ta. Lokayukta chuan eirukna emaw, diklo taka contractor duhsakna emaw, thil sual dang awmin a hmu lo.

Nimahsela, tender chhan dan tur kawng a dan zawm tur chu zawm a ni lo tih sawiin, a hnu zela chutiang thil a thlen tawh loh nan department chu fimkhur turin a ti thung.

He thubuai hi Vanlalruata Sailo thehluh a ni. Finance Department-in October 22, 2025-a hna 41 te chu dan pangngai ni lo (blanket approval)-a a pawm sak chu dik lo a ti a, open tender hman aiin restricted tender hman a nih avangin contractor thenkhat duhsakna atan hman theih a ni tih a sawi a ni.

Tin, he thil hi CPWD Manual leh Rules and Regulations-in a tarlang anga kalpui a nih loh thu a thlen.

Lokayukta chuan he thubuai chungchangah hian chhui fiahna (preliminary inquiry) nei hmasa phawt turin thupek a chhuah. Chhui fiahtu officer chuan July 30, 2026 khan report a thehlut a, report chuan restricted tender hman chhan ber chu pawisa hman theih hunchhung hun bi tuk a awm avanga hna rang taka zawh fel a ngaih vang a ni tih a tarlang.

Finance Department pawhin Lokayukta hnenah hian open tender chuan ni 21 a duh laiin, restricted tender erawh ni sarih (7) chhungin a zawh fel theih tih an hrilhfiah.

Sorkar chuan hna zo fel tur a Union Ministry of Finance hun bituk chhung ngeia hna zawh a ngaih vang a ni tih an sawi bawk.

Lehkha pawimawhte enfiah a nih hnuin, Lokayukta chuan contractor thenkhat duhsakna tura he tender hi kalpui niin a hmu lo. Chutiang bawkin dik lo taka thil tih emaw, mimal hlawkna umna chungchangah finfiahna an hmu lo bawk a ni.

Nimahsela, Lokayukta chuan hna thenkhat chu danin a phut ang ni loa bidder tlem zawk hnenah pek an ni tih a hmu chhuak. Registered firm pawimawh zawng zawng hnenah pawh hriattirna thawn vek an ni lo bawk.

Lokayukta chuan tun hnuah erawh restricted tender an hman dawnin a chhan bulpui chu chiang taka ziak lang tawh thin turin Finance Department chu a ti. Hun tiam chhung a awm avanga hmanhmawhthlak thil a nih loh chuan open tender hmang thin turin a rawn.

Hetiang hi a nih avangin he thubuai hi chinfelin a awm ta a ni

Thulakna : www.jclalnunsanga.in