Minister-in Ngaizel kham minna ṭhin a tlawh

Vawiin (19.8.2026) chawhnu dar 2 khan PWD Minister Vanlalhlana chuan Ngaizel kham; Lalnghakliana Petrol Pump epa min ṭhin a tlawh. He kham min ṭhin buaipuitute; Geology & Mining Dept., DM&R, PWD leh Aizawl District Disaster Response Team (ADDRT) ten an ṭawiawm a ni.

PWD Minister PNgaizel kham phei min ṭhinin harsatna a thlen nasat thu a sawi a, “Helai hian harsatna, chhiatna, in leh loh chânna leh mihring nunna hial chânna a lo thlen tawh ṭhin. Kum 20 zet chu min tibuai tawh a ni. Sorkarin theihtâwp a chhuah a, thawktute pawh an fakawm, a tira a hlauhawm ang em em khan a hlauhawm tawh rih lo a ni,” a ti a, tihchangtlun zel tum a nih thu a sawi.

Cement-a phuhna shotcrete khawl hmanga nghet leh daihrei zawk tura tih tum a nih thu sawiin PWD Minister chuan, “Shotcrete khawl leina man hi cheng vaibelchhe 2.4 te a ni. DM&R lamin nghet (permanent) zâwka he hmun hlauhawm hi siam theihna tur buaipuiin, DPR an buaipui mêk. Tuna mi hi chu rei vak lo chhûng (temporary) atana siam a ni,” a ti.

Geology & Mining Dept. geologist pahnih – V. Lalbiakmawia leh Benjamin Roluahpuia chuan Ngaizel khâm an buaipui dan an sawifiah a, “Kham hi a bal tur ang ang chu hriat phâk chinah tihtlaktîr a ni tawh a, tunah chuan tlâk hlauhawm zualpui chu a tla tawhah kan ngai. Kan khuhna hi Agronet 75% uv ray daltu a ni a, ruah leh nî laka humhim hi a pawimawh,” tiin lung lian lêm lo tla thlengin a hlauhawm êm êm avangin an ven tel thu an sawi.

Geologist-te sawi danin tuna Lalnghakliana Petrol Pump ep Ngaizel kham pang Agronet rawng hring hmanga khuhna hi a san lam meter 110 vel a ni a, a vang zawng hi meter 65-80 a ni. Hei hian hun eng emaw chen chu a vawn beisei a ni.