Minister-in Zo Hall a hawng

Nimin (19.8.2026) khan Aizawl Smart City Ltd. (ASCL) hnuaia sak ‘Zo Hall’, Chaltlanga mi chu Urban Development & Poverty Alleviation (UD&PA) Department Minister K. Sapdanga’n khuallian niin a hawng. He hunah hian Tourism Department Minister Lalnghinglova Hmar chu khualzahawm a ni.

Hawnna inkhawm buatsaihah khuallian K. Sapdanga chuan thu sawiin, “India ram pawhin ram changkangte tihdan zuiin, project lian thamte chu sum thawk chhuak thei tura siam a ngaipawimawh hle. Zo Hall hian sum tam tak a thawhchhuah beisei a nih bakah, tualchhung mipuite tan tourism kaltlanga sum lakluh tihpunna hmanrua leh sawrkar hlawhtlinna tehfung pawimawh tak a nih ka beisei,” tiin Tourism Department- chu tangkai taka Zo Hall hmang chhunzawm zel turin duhsakna a hlan nghal.

Khualzahawm Lalnghinglova Hmar pawhin thu sawiin, “Zo Hall hi Tourism Department hnuaia program hrang hrang huaihawt nan a zahpuiawm lo mai ni loin, a chhuanawm em em a, hmang tangkai thei zawk tur anga min ngaih avangin ASCL-ten kan enkawl turin min pe a, kan lawm hle a ni,” a ti.

Zo Hall hi UD&PA Department hnuaia Aizawl Smart City Mission hmalakna pakhat niin, Aizawl Smart City Ltd. (ASCL) ten an sak zawh hnuah Tourism Department kutah an enkawl zui tura hlan a ni. Hall hi Rs. 18,92,93,390 (vbc. 18.92) senga sak a ni

Zo Hall-ah hian hmanraw pawimawh leh hmunhma pawimawh tak tak a hnuaia tarlan ang hian dah a ni:

1.Auditorium: Mi 292 lenna a ni a, arm chair 281 bakah sofa (3-seater pathum leh 2-seater pakhat) 4 dah a ni.

2.Stage & Sound System: Automatic projector, automatic curtain, lighting leh sound system changtlung tak dah niin, mipa leh hmeichhe inthlakna tur green room hran ve ve siam a ni.

3.Parking: Basement-1 leh basement-2 ah lirthei dahna tur siam niin, 4-wheeler 29 leh 2-wheeler 32 a leng.

4.Quarters: Type III (82 m²) pakhat, type II (59 m² ) pakhat, leh type I (59 m²) 6 awmin, staff quarters 8 a awm.

5.Facilities dangte: Tui dahkhawlna (water reservoir) litre nuai 1.2 dawng, lobby, cafeteria leh gallery-ah mipa leh hmeichhe inthiarna (washroom) changtlung tak siam a ni.