Mipui beiseina ti hlawhtling turin kan inbuatsaih

Vawiin (24.8.2026) hian MNF chuan an office-ah chhung inkhawm an hmang a, thusawitu MNF Treasurer Lalruatkima chuan, “Mipui phurrit tam tak ZPM-in a siamte chhawk zangkai tur leh Mizo nationalism chawi nung turin MNF kan inbuatsaih a ni,” a ti a, kum 2028 inthlanah MNF chu mipui beisei ber party a nih avangin insiamthat ngaite insiamtha zelin, mipui beiseina ti hlawhtling tura an inbuatsaih thu a sawi.

Lalruatkima chuan MNF-in zalenna a sual chhan sawiin, “Kan hnam, kan ram, kan sakhua a him nan leh zalenna sang ber kan neih theih nan MNF chuan zalenna a sual. Kan hnam pasalṭha leh martar-te avangin hnam zahawmah kan chhuak a ni. Nationalism tel lo a Mizo hnam leh Mizoram kaihhruai hi a pawi thei a ni. Tunhnai Shillong buaina pawh a ram neituten ram leh hnam humhimna kawnga an tlai vanga thleng a ni. Kum 1966 a thlarau kan chan ang, ram leh hnam hmangaihna khan ṭhalaite thinlungah thusawi leh rawh se,” a ti.

Remna thuthlung in a ken tel Article 371G in a huam FCA Act, 2023 ZPM Sorkarin a adopt a, halral thil hlana an hlan ta mai hi a pawi em em nia sawiin MNF Treasurer chuan, “Thangtharte hian ZPM Sorkar hi an la rawn dem ang. Remna thuthlung bawhchhiatna a ni a, remna thuthlung bawhchhe hmasa ber sorkar an ni. An inhmuh chhuah hunah meuh chuan a tlai tawh ang. Remna thuthlung Chief Minister-in a sawi bawrhbangte hi a pawi hle. Remna duh avanga IPS bang niin a insawi thin a, ‘remna thuthlung point tinah ka tel’ tituin enga tinge a sawi bawrhban leh si?” tiin uiin a luak hnu a ei leh, tih ang chauh a nih thu a sawi.