Mizo Inneih leh Rokhawmna Dan ennawntute thukhawm

Vawiin (3.9.2026) Mizo Inneih leh Rokhawmna Dan ennawntu Review Committee chu an Chairman Zahmingthanga Ralte, Law & Judicial Addl. Secretary hoin Secretariat Conference Hall-ah an thukhawm a, nupui pasal then tawhin mi dang neih leh an duh chuan inneihtir hmain court atangin an nupui pasal hmasa an then tih lantirna an nei ngei tur a nih thu tarlan niin, ‘nuta man’ in eitir thin chu tha an ti lo.

Committee chuan, kumin Mizoram Assembly Budget Session-a Mizo Inneihna leh Rokhawmna Dan siam that ‘The Mizo Marriage & Inheritance of Property (Amendment) Act, 2026’ angin kohhran hrang hrangten Inneihna Certificate an pek chhuahah ‘divorce’ tih thumal chu ‘In accordance with the Mizo Marriage & Inheritance of Property Act, 2014’ tia thlak vek turin kohhran hruaitute am chah.

Committee Chairman chuan, kohhranten anmahni huang chhungah inneihna thiah leh inneih leh phalna pek dan an neih chungchangah he dan hi inrawlh lo mah se, he dan siamthat vang leh ram dan-in a phut angin ‘nupui pasal then tawhin mi dang neih leh an duh chuan inneihtir hmain court atangin an nupui pasal hmasa an then tih lantirna (divorce certificate) an nei ngei tur a ni a, chutiang nei lova midang nei leh chu kum 7 emaw a thua zirin kum 10 thleng pawh lungin tan tira hrem theih an ni dawn tih sawiin, nupui/pasal dang neih tum leh inneihna buatsaih tute pawh fimkhur turin a chah nghal a ni. (Assembly-in dan a siam thatah hian nupui/pasal nei leh tur ten Divorce Certificate an nei em tih hriat chu inneihtirtu mawhphurhnaah a dah a ni).

Vawiina thukhawm hian Man leh Mual inhlannaa ‘thian man’ leh ‘nuta man’ bakah ‘nu man’ chungchang pawh ngaihtuah nghalin, thian man chu mi nawlpuiin inneihna kan kalpui mek dante thlir chung leh Perry Sap Dan (A monograph on Lushai Customs & Ceremonies)-ah te, Mizo Hnam Dan 2006-ah te a lo lan tawh avangin, huam zau zawk a telh chhunzawm an rawt dawn. Nuta man erawh chu hman ngai loh thil leh chin thar mai nia a lan avangin ching chhunzawn lo hram turin Mizo mipuite an ngen. Hei bakah hian nu man chu hringtu nu chauhvin a ei tur, chupawh man dawngtu a nih loh emaw pasal nei tur-i pa nen an awm hran chauhva a ei tur a ni a, midangin ‘nu man an ei thei lo’ tih a ni.

He hunah hian Mizoram Bar Association (MBA) President R. Lalremruata pawhin Supreme Court in non-tribal fa hrin, tribal zinga khawsa, anmahni pawh inti hrang lo, khawtlangin an mi leh sa anga an pawm theihte tribal hamthatna pek theih dan a rel tawh leh Mizoram Sawrkarin a kalpui dan a sawifiah nghal.