Khawvel pum huapa mithiamte zirchianna (research impact) enfiahtu, Stanford University (USA) leh Elsevier-ten an buatsaih World’s Top 2% Scientists 2026-ah Mizo mithiam pahnih Dr. Lalduhsanga Pachuau leh Dr. Samuel Lalthazuala Rokhum te an tel.
Assam University, Silchar-a Department of Pharmaceutical Sciences-a thawktu Dr. Lalduhsanga Pachuau chu khawvel huap chawimawina ‘Wolrd’s Top 2% Scientists 2026’ zingah a hming tarchhuah thar a ni. Ani hian damdawi siam chhuah leh a kaihhnawih zirchianna (Pharmaceutical Sciences) lamah research paper tha tak tak a lo tichhuak tawh a, Society for Pharmaceutical Education (SPER), India leh Thai Industrial Pharmacist Association, Thailand te buatsaih, ‘Young Scientist 2019 (Pharmaceutical Science) atan pawh thlan a lo ni tawh.
National Institute of Technology (NIT) Silchar-a thawk Dr. Samuel Lalthazuala Rokhum pawh a zawnin kum 2024, 2025 leh 2026 chhung khan ‘World’s Top 2% Scientists’ list-ah hian a hming a lang a ni. Dr. Samuel-a hi Energy leh Strategic Technologies zirchianna lamah khawvel huapin a thawhhlawk hle a, a sub-field bikah khawvel pumah 1805-na dinhmun hauhvin H-index 23 leh Hm-index 10 a nei a ni.
Stanford University leh Elsevier-te hian khawvel pum huap a Scopus database hmangin, zirchianna paper chhuah tam zawng ringawt nilovin, mi dang ten an paper-te an hmanna (citations) leh an zirchianna a taka an thawhhlawk dan teh chungin khawvel pum huap in a ber 2% chauh an thlang chhuak thin a ni.