Mizoram Sawrkarin S4C a din

Mizoram Police chuan Cyber Crime-in mipuite, sumdawngte leh digital economy tan harsatna a thlen chho mek tih tarlangin, “Hetiang pawikhaihna dona kawngah hian Mizoram Police chuan theihtawpin hma a la chho ve mek a ni,” an ti.

Mizoram Police tarlan danin, Mizoram Sawrkar chuan Cyber Crime dona kawnga chak zawka hmalak a nih theih nan July 27, 2026 khan State Cyber Crime Coordination Centre (S4C) chu Mizoram Police hnuaia Unit hran angin a din a ni. S4C hi Cyber Crime dona kawnga hmalak ngai hrang hrang – chhuina, zirchianna, mipui zirtirna, social media vil hna leh emergency-a chet vat dante buaipui tura ruahman a ni.

Inbumna pawisa lak kir lehna: Money Restoration Module hi Cyber Crime avanga pawisa thila bumna tawk ten an pawisa chan hmuh let leh theihna tura siam portal a ni a, cyber crime victim ten an complaint kaihhnawiha an pawisa bank-a la tangkhang te lak kir leh theihna tura siam a ni. Kumin 2026 chhung hian Cheng Vaibelchhe khat, nuai ruk, sing li, sang li, zali leh sawm paruk (₹ 1,06,44,,416/-) zet chu Cyber Crime tuarte hnenah pek kir leh a ni tawh. Hei hi Money Restoration Module (MRM) leh danin a phal anga hmalakna dangte kaltlanga tih a ni.

Mizoram Police chuan social media-a zahmawh rawngkai leh dan kalh thil post chungchanga thubuai lutah rang takin hma a la nghal vat thin a. Heng thubuai bawhzuina avang hian dan kalh online content URL tam tak chu paih bo (takedown) a ni tawh a ni.

Harsatna Chinfelsak – Grievance Redressal Mechanism hi online inbumna a inhnamhnawih si lova, dik lo taka bank account block emaw sum hrensak avanga harsatna awm thei chinfelna tura siam portal a ni. Kumin chhung hian hetiang harsatna ang chi 28 lai chu hun khawh ral lovin chinfel a ni tawh.

Cyber Criminal man – Kumin chhung hian State chhung hmun hrang hrang atangin Cyber Crime Police Station ten cyber criminal mi 9 an man tawh a ni. Mizoram Police chuan Cyber Crime chhuina kawngah State dang Police te nen thawhhona tha tak an nei chhunzawm zel bawk.

Mipui Zirtirna leh Thawhhona – Mizoram Police hian cyber-crime laka invenna chungchang zirtirna hi a kalpui reng a, kumin chhung ringawt pawh hian a bikin Sikul leh College zirlaite hnenah zirtirna programme vawi 89 kalpui tawhin zirlai 9000 chuangin he zirtirna programme hi an chhim tawh a ni. DDK, Local Cable Channel leh All India Radio ah te Talk Show leh zawhna leh chhanna hun te hman fo a ni a, Mizoram Police Social Media Channel te pawh mipui zirtirna thu theh darh nan hman a ni reng bawk.

Online-a pawisa kaihhnawih bumna emaw, cyber crime i tawk a nih chuan, rang takin Cyber Crime Helpline – 1930 (24×7 a biak theih reng) ah emaw, National Cyber Crime Reporting Portal (cybercrime.gov.in) ah report nghal tur a ni. I pawisa kha hmuh kir leh theih a nih chuan SMS alert i dawng ang a, Money Restoration Module (mrm-ncrp.mha.gov.in/) kaltlangin i pawisa i dil let thei ang. Tanpuina i mamawh chuan Cyber Crime Police Station, 3rd Floor, SP Aizawl Office Building, Treasury Square, Aizawl pawh pan theih reng a ni.